Shillong, Naitung 30:
Wat la ka jingkhyllem ka tnum (Dome) ba la dep tei ha ïingdorbar thawaiñ kaba thymmai ha Mawdiangdiang, New Shillong ka la dap shisnem hynrei haduh mynta kane ka ïingdorbar ka la shu sah khongreng namar ym shym la pyntrei shuh.
Kane ka ïingdorbar thawaiñ jong ka jylla ka don harud surok bah na NEIGRIHMS Hospital, Shillong ban leit sha Mawkasiang bad Umsawli. Hynrei ha kine ki sngi ym shym la ïohi ïa ki nongtrei ba kin pyntrei ïa katei ka ïingdorbar namar la shu ieh sah ïa katei ka tnum kat haduh mynta.
Kum ban shu pynkynmaw, ka tnum jong ka ïingdorbar thawaiñ ka la khyllem ha ka 22 tarik u Jymmang, 2022 haduh ba ki kynroh jong katei ka ïing ki la orpait lut namar ka jingkhia palat.
La ïohi ba ïa ka phyllaw jong kane ka ïingdorbar la shu ieh khongreng ïa ka khyndew kaba khlem pat lah ban pynmadan naduh ba la khyllem katei ka tnum jong ka ïingdorbar naduh u snem 2022.
Ka jingthmu jong ka sorkar ka long ban pyndep noh kham kloi ban ïoh shong dorbar hashwa ka ilekshon MLA hynrei namar ka jingkhyllem noh katei ka tnum kane ka jingthmu la sahkut noh.
Haduh mynta ki MLA ki hap ban shong ha ka ïingdorbar kaba don ha Rilbong naduh ba ka ïingdorbar barim kaba don ha Khyndailad ka la pluh noh.
