Shillong, Naitung 30:
Hadien ba ka Meghalaya Energy Corporation Ltd (MeECL) ka la shim ïa ka ram lyngba ka skhim Atma Nirbhar Bharat Abhiyaan (ANBA), mynta ka la dei sa ka pali jong ka ban sdang siew noh ïa kane ka ram kaba la kot palat T.1,100 klur, bad ka por ban siew ïa kane ka ram ka long 10 snem.
Ka MeECL lyngba ka jingkyrshan ka Sorkar Jylla ka ïoh ban shim ïa ka ram kaba T. 1,345 klur lyngba ka ANBA jong ka Sorkar Pdeng, tangba ka khlem shim lut ïa kane ka ram. Ka MeECL ka la shim T. 1,101 klur namar ïa ka T. 244 klur ka khlem shim namarba ka dei ka pisa kaba hap ban siew sha ka NPTC kaba dang don ha ka jingbym lah ban pynbeit.
U Chairman-cum-Managing Director MeECL, u Sanjay Goyal u la ong ba ïa kane ka ram yn siew ïa ka sut kaba long 9.5 percent bad ka por ban siew ka dei 10 snem.
U la ong ba jingsiew ram kan long kumba T. 7 klur shi bnai bad ka MeECL kan hap ban pynmih ïa ka pisa ha ryngkat ka jingkyrshan ka Sorkar Jylla.
Nangta, u la ong ba wat la ka MeECL ka kyrduh pisa, hynrei hap ban thaw ki lad ki lynti kumno ban pynmih ïa ka pisa namarba ka jingpynlut ka long kumba T. 140 klur shi bnai, katba ka jingïoh pisa ka long hapdeng T.80 klur bad T.100 klur shi bnai.
Ka MeECL ka la ïoh ka lad ban shim ram lyngba kane ka skhim jong ka Sorkar Pdeng na ka bynta ban siew ïa ki ram kiba sahteng haba ïadei bad ka jingthied bording ilektrik na kiwei pat ki kompani kum na ka NEEPCO bad kiwei kiwei ki kompani kum ka Power Grid Corporation of India Limited (PGCIL).
Kum ban pynkynmaw, ka Sorkar Jylla ka la ai jingmynjur ban kyrshan ïa ka MeECL ban shim ïa kane ka ram ha u Nailar, 2020 khnang ban kyrshan ïa ki kompani ka MeECL ba kin lah ban treikam khamtam eh ban siew noh ïa ka ram ba pynsahteng ha ka por ba thied bording ilektrik.
Ha kine ki lai snem naduh 2020, ka MeECL kam pat donkam ban siew ïa ka ram, hynrei hadien lai snem, kata naduh mynta u snem (2023) ka la dei ban sdang siew noh bad hap ban siew dep ïa ka ram haduh 10 snem.
