Shillong, Naitung 30:
Ka Meghalaya College Teachers’ Association (MCTA), ka synjuk ki nonghikai kolej ha ka Jylla ka la shim ïa ka rai ban ym ïatreilang bad ka skulbah North Eastern Hill University (NEHU) ha ka jingpynjari ïa ka National Education Policy-2020 ha ki kolej.
“Ka dawbah jong kane ka rai ka long ba ka skulbah kam shym la bud ryntih ïa ka rukom treikam kumno ban pynjari ïa katei ka mat treikam. Ha ka jingshisha, ïa ka jingpyntreikam ïa ka NEP, la dei ban wanrah shuwa ha ka ‘Academic Council’ (AC) kaba dei ka dorbar rai-kam jong ka NEHU. Kaba sngewsih ka long ba ym shym la don kano-kano ka rai halor kane ka bynta bad ha ka jingshisha ka AC ka la kdat sharud ïa ka mat la yn pyntreikam ne em ïa ka NEP ha ka Jylla naduh kane ka samoi pule 2023-24,” la ong u General Secretary ka seng, Dr. A.W. Rani ha ka kyrwoh khubor.
U la ïathuh ba ki mat kiba la ïakren ki long beit tang haba ïadei bad ka jingpynkhreh – kata ban shna ïa ki ‘Curriculum’, ‘Syllabus’ bad kiwei-kiwei bad na ka liang u Vice Chancellor (VC) ruh u la kren shai ba ïa ka jingpyntreikam yn ieh shuwa sharud bad yn sa peit pat ha ki por ban wan.
U Dr. Rani u la ong ba ka jingïalang kaba khatduh jong ka AC tat haduh mynta ka la long ha ka 2 tarik Jylliew, 2023 bad kane ka dei ka sienshong kaba 110 jong ka.
Haba kdew ba ha katei ka jingïalang la donlang ruh ki dkhot ka MCTA, u la ïathuh ba ha katei ka jingïalang ym shym la don kano-kano ka rai ban pynjari ïa ka NEP-2020 bad la pyntikna shuh-shuh da ka jingpynïaid sdang jong ka jingïalang kaba pyni ba ym shym la don ka rai kaba kum kata.
“Kaba sngewlyngngoh ka long ba ha ka 12 tarik mynta u bnai, ka la wan ka hukum na u ‘Officer on Special Duty’, u D. Choudhry, College Development Council ba baroh ki kolej ha ka Jylla ki dei ban sdang pyntreikam noh ïa ka NEP naduh ka samoi pule 2023-24. La pynshong nongrim ïa katei ka hukum ha ka rai jong ka jingïalang ba 110 jong ka AC. Ha ka jingsngewthuh jong ka MCTA, katei ka hukum ka long ka bym don nongrim, kaba lamler bad kaba ïalam bakla namar ba ha ka jingïalang kaba 110 jong ka AC ym shym la don eiei kaba kum kata ka rai ban pyntreikam noh ïa ka NEP ha ki kolej jong ka Jylla,” la ong u General Secretary.
Ka MCTA ka ïohi ïa kane ka hukum kum ka kam beaiñ jong ka skulbah bad ka jingshukor jong u VC bad na ka liang ka seng ka la phah dorkhas ruh sha u Vice-Chancellor ha ka 21 tarik Naitung, 2023 ba u dei ban weng mardor ïa katei ka hukum kaba lamler bad ban pynbeit ïa ki jingbakla baroh.
Ïa katei kajuh ka dorkhas la phah kopi sha u Myntri Rangbah, u Myntri ka Pule-Puthi, u Chief Secretary bad la ïoh ban pynphriang ruh lyngba ki lad pathai khubor.
Ha kawei ka liang, kaei kaba la pynsngewsih ïa ka seng ka long ba u VC u la sngap mynthi halor jong katei ka jingdawa bad kane ka pyni ïa ka jingbymsuidñiew jong u ïa ka kam bad ka jingbym kheiñ snep ïa ka MCTA bad ïa ki dkhot jong ka ha ka AC.
“Dei halor kane ka jingkuman u VC bad ka jingsngap jar na ka liang ka Sorkar ba ka MCTA ka hap ban shim ïa kane ka sienjam kaba tyngeh bad kata ka long ban ym ïatreilang bad ka NEHU ha kaba ïadei bat ka jingpynjari ïa ka NEP,” ong ka kyrwoh na ka seng.
Shuh shuh ka seng ka pynbna ïar ïa ka jingïakhih ba khlem buh por ba kan ym ïatreilang bad ka NEHU halor ka jingpyntreikam ïa ka NEP.
“Da kane ka seng ka hukum ïa baroh ki dkhot jong ka ba kim dei ban shim ïa ki klas jong ka ‘First Semester’ ha baroh ki sobjek naduh ka 1 tarik Nailar, 2023. Ki dkhot kim dei ruh ban shim kano-kano ka kam haba ïadei bad ka jingpyntreikam ïa ka NEP tat haduh ban da pynbna da kumwei pat,” la ong utei u nongïalam ka MCTA.
Ka seng ka la kdew shai ba ka jingtrei bad jingshim ïa kiwei pat ki klas katkum ka rukom long kaba rim kan ïaid beit kumba ju long bad kyntu ïa kiwei pat ki nonghikai ki bym dei ki dkhot jong ka seng ban kin ai ka jingkyrshan ha kane ka kynti.
