Islamabad, Naitung 30 (UNI):
Kumba 35 ngut ki briew ki la khlad katba palat 200 ngut ki la mynsaw ha ka Sngi U Blei hadien ba u bom u la bthei ha ka jingïalang paidbah ha Bajaur distrik jong ka Pakistan, la ong ka khubor na Northwestern Khyber Pakhtunkhwa Province.
Uwei u heh na ka shlem treikam u Lat ha Peshawar u la ong ba haduh mynta, la pynthikna ba 35 ngut ki briew ki la ïap bad ka jingïap briew ka lah ban nang kiew namar ki don kumba 50 ngut kiba la mynsaw jur ha katei ka jingjia.
U Nasir Mehmood Satti, uba dei u pulit ha ka Regional Police Office ka Malakand Division, haba kren sha ki lad pathai khubor, u la ïathuh ba katei ka jingïalang ka dei kaba la khot pynlong da ka seng Jamiat Ulema-e-Islam-Fazl (JUI-F) na ka bynta ki nongtrei bad nongkitkam. Ïa kane ka jingïalang la pynlong hajan ka Shanday Mor ha Munda Khar Road ha Bajaur.
Utei u heh pulit u la ong ba mar ïa bthei, ki pulit bad kiwei ki bor pahara bad ki nongai jingïarap ki la leit sha katei ka jaka ban kit ïa kiba la khlad bad mynsaw sha ki hospital kiba don marjan.
U Akbar, uba long uwei na kiba la ïohi ïa katei ka jingjia, u la ïathuh ba u la ïohsngew ïa ka jingsawa kaba jam bad hadien kata, u la ïohi sa ïa ki metïap bad ki briew kiba la mynsaw.
“Nga la ïarap ban kit ïa ki briew kiba la mynsaw bad kiba la khlad sha hospital. Kane ka dei ka jingleh kput bad dusmon ïa ki paidbah kiba lui-lui,” la ong u Akbar.
Ki pulit ki la pynthikna ba katei ka jingjia ka dei namar ka jingpynbthei bom, hynrei ki dang wad ban pynthikna la ka jingbthei ka dei na u bom ba la buh ha katei ka jaka lane u bom ba la pynbthei da u riewkheiñduh.
Haduh mynta, ym pat don satia kano-kano ka kynhun kaba la shim jingkitkhlieh halor katei ka jingpynbthei bom.
