Mawkyrwat, Naitung 30:
Uwei u samla u la duh ei noh ïa la ka jong ka jingim katba uwei pat u la mynsaw jur ha ka jingjia takhuh kali ha Mawkyrwat ha ka Sngi U Blei.
Une u samla ba la khlad u dei ba la tip kyrteng kum u Shemphanglin Lyngdoh, 23 snem ka rta, bad une uba mynsaw uba dei ruh u nongñiah jong ka thuk-thuk u dei uba la ithuh kum u ïalambok Lyngdoh bad baroh arngut ki dei na ka shnong Mawlangwir, South West Khasi Hills District.
Katkum ki tyllong khubor na ki pulit la ïathuh ba kane ka jingjia ka la jia ha ka por kumba 2:30 noh phai sngi eiei ha kaba ka thuk-thuk kaba dei ka Pulsar rong ïong kaba don ïa u nombor ML05 E 7511 kaba ñiah da u ïalambok Lyngdoh ha ka jingdon ryngkat u Shemphanglin Lyngdoh uba shong ka la ïatyngkhuh bad kawei ka kali Alto kamai kaba don ïa u nombor ML 12 2962 hajan Civil Hospital Mawkyrwat.
Ki tyllong khubor ki la ïathuh ruh ba kine arngut ki la mih na Mawlangwir ban leit sha Mawkyrwat. Katba katei ka kali kamai (Local Taxi) pat ka dei kaba mut ban leit on briew sha Mawranglang. Ha kane ka jingjia u Shemphanglin u la khlad hashen bad ïa u ïalambok pat la pynkit noh mar-mar sha Civil Hospital Mawkyrwat ban ïoh ïa ka jingsumar.
Ha kaba ïadei bad kane ka jingjia ki pulit haduh mynta ki dang pynlong ïa ka jingtohkit.
