Shillong, Naitung 30:
Ka Trinamool Congress (TMC) ka lah ban ym pynïeng kyrtong na Shillong konstitwensi ha kane ka ilekshon ban wan sha ka Lok Sabha.
“Ngim pat pyrkhat la ngin pynïeng kyrtong ne em ha kane ka ilekshon ban wan sha ka Lok Sabha,” la ong u President ka seng, Bah Charles Pyngrope haba kren sha ki lad pathai khubor ha ka Sngi Saitjaiñ.
U la ong ruh, “Kumba phi la ïohi, ngim shym da seisoh bha ha ka ilekshon ba dang shu dep khamtam ha Ri-lum Khasi-Jaiñtia. Kumta kan dei ka rai kaba eh ka ban hap shim.”
La ka seng kan kyrshan ne em ïa kiwei pat ki seng saiñ pyrthei ha ka ilekshon sha ka Lok Sabha, u Bah Pyngrope u la ong ba kane kan sa wan ynda ka seng ka la shim rai ban leh kumno halor katei ka bynta.
“Kumba ki ong, ngin sa jam sha shiliang jingkieng ynda ngi la poi hangta,” la ong utei u nongïalam.
Kum ban shu kdew hangne, ka Congress ka la dep rai ban pynïeng ïa u President ka seng, Bah Vincent H. Pala, u ban ïakhun na bynta ban shah jied biang kum u MP ha kane ka ilekshon ban wan na Shillong Parliamentary konstitwensi.
Ha kawei ka liang, haba phai pat sha Tura konstitwensi, ka seng kan sa khot aplikeshon ïa kito kiba sngew don mon ban ïakhun kum u/ka kyrtong jong ka seng. Ïa kane la ïathuh hashuwa da u nongïalam ka Congress Legislature Party (CLP), Bah Ronnie V. Lyngdoh.
Ha kajuh ka por, ki don kumba 6 ngut kiba la aplai tiket na ka NPP na bynta ban ïakhun ha kane ka ilekshon ban wan sha ka Lok Sabha na Shillong.
Kumjuh, ka Voice of the People Party (VPP) hashuwa ka la pynbna ïa ka kyrteng jong u Dr. Ricky A.J. Syngkon kum u kyrtong ka seng u ban ïa aireng ha ka ilekshon ban wan sha ka Lok Sabha.
Ka State Election Committee (SEC) jong ka seng ka la ïakynduh ha ka 16 tarik u Jylliew bad hadien ka jingpyrkhat sani bha, la mih kawei ka rai – ban pynïeng ïa u Dr. Syngkon kum u kyrtong ka VPP na bynta ka ilekshon MP ka ban long ha u snem ban wan na Shillong, konstitwensi.
U Dr. Syngkon ha kajuh ka por u dei ruh u General Secretary bad u dkhot nongseng jong ka VPP bad kumta ka seng ka sngew ba u long u briew uba biang eh ban mihkhmat ïa ka seng ha kane ka kynti.
