Shillong, Naitung:
Hadien ka jinglap ba ka la don ka jingtei thymmai ïa ka ‘building’ ha Them Ïew Mawlong, na ka liang ka Hynñiewtrep National Youth Front (HNYF), East Khasi Hills ka la leit ban ïakynduh ïa ka Shillong Municipal Board (SMB) bad ïa ka MUDA ban lap ïa ka jingshisha halor kane.
Haba kren sha ki lad pathai khubor mynta ka sngi ha Shillong Press Club, u President ka HNYF, u Bah Bless Dkhar u la ïathuh ba ïa katei ka jingtei, ka Meghalaya Urban Development Authority (MUDA) ka la pynsangeh noh da kaba pynmih ïa ka jingpyntip lane ka ‘notification’ ba ka la pynsangeh ïa katei ka jingtei thymmai ha Them Ïew Mawlong.
“Ngi la leit sha MUDA bad ngi la ïoh ïa ka jingthoh lyngba u Secretary jong ka MUDA kaba la pyni ba ki lah pynsangeh ïa kato ka kam”, la ong u Bah Dkhar.
U Bah Bless Dkhar u la ïathuh ba ïa katei ka jingtei thymmai la tei hadien ka Thangkhiew Petrol Pump bad katei ka jingtei ka dei jong ka Kong Phibora Marweiñ.
U Bah Bless u la ong ba ka jingpyrshah jong ka seng ban tei ïa ki jingtei thymmai ha Them Ïew Mawlong kadei namar ba katei ka jaka ka dang don hapdeng ka jingïatai ha ïingbishar ka Meghalaya High Court namar ka sorkar jylla ka dang ïaleh ban pynkynriah ïa ki briew kiba shong ba sah ha katei ka jaka sha kawei pat ka jaka.
“Katei ka jaka hangthie ka dang don hapoh ka ïingbishar namar ba ngim kwah ban ïohi ba kine ki jingtei beaiñ kin mih na shane-shatei”, la ong u Bah Dkhar.
Shuh shuh u Bah Bless u la ong ba na ka liang ka seng hadien ba ka la ïoh ïa katei ka jingthoh, kan sa ïai buddien ban pyntikna ba la katei ka hukum ka treikam shisha ne kam treikam ban pynsangeh ïa ka jingpyntrei, bad lada lap ba ka khlem pynsangeh, na ka liang ka seng kan sa shim noh da kawei pat ka sienjam.
“Ngin peit pat hadien ba ngi la ïoh ïa kane ka hukum ka treikam ne kam treikam bad lada kam treikam, ngi ruh ngi hap ban ïaid noh sa da kawei ka sienjam”, la ong u Bah Dkhar.
Haba kylli mano ba ai jingbit ban tei jingtei ïa katei ka jingtei thymmai ha Them Ïew Mawlong, na ka liang u Bah Dkhar u la ong ba kumba ka paw na ka jingpyntip ba la pynsangeh ïa ka jingtei thymmai ka dei hi ka MUDA ba ai jingbit namar lada kam ai jingbit, kam don bor ban pynsangeh ïa katai ka jingtei bathymmai.
