Shillong, Naitung:
Ka seng United Hynñiewtrep Movement (UHM) hapoh ka jingïalam jong u Education Secretary ka CEC, u Bah Steward Malngiang ka lah leit ban khang khyrdep ïa kawei ka dukan Diary kaba don ha Garikhana ha ka 26 tarik u Naitung, 2023 halor ka jinglehsih bad ka jingbym leh khuid jong katei ka dukan halor ka bam ka dih.
Hadien ba ka seng ka lah ïohpdiang ïa ki jingujor na kiba bun ba katei ka dukan bam kam shim lah pynbiang ïa ka jingkhuid jingsuba bad kumjuh ruh ba kam lah ban pynbiang ïa ki kot ki sla kiba biang halor ka jingdon jong ki nongtrei ba ka la buh, na ka liang ka seng ka la leit ban sakhi hi dalade bad ka lah lap ïa ka jinghisha halor kane.
Ka seng ka la ïathuh ba ha ka jingleit khynra jong ka ïa katei ka jaka bam, ka la lap ba ka long kaba isaitmet namar ka jingjakhlia eh katei ka dukan. Dei halor katei ka nongrim ka seng kam banse ban phah khang noh shisyndon ïa katei ka dukan bad na ka liang ka seng ka lah mana ruh ïa ki trai jong katei ka dukan ba katba kim pat lah ban pynbiang lut ïa ki jingdonkam katkum ki kyndon jong ka tnad ba dei peit ïa ka khuid ka suba halor ka bam ka dih bad kumjuh ruh katkum ki jingmaham ka seng, katei ka dukan kam lah satia.
Na ka liang seng ka la kyntu ruh ïa baroh ki dukan kiba ïadei ha ka bam ka dih khamtam ki dukan jong ki bar jylla ba lada ka lap ba ka khuid ka suba kim lah ban pynbiang bad kumjuh ruh ïa ki kot ki sla kiba biang jong ki nongtrei bylla jong ki, ka seng kan nym ailad ba kin pynïaid ïew ïa ki dukan jong ki bad ka seng kan ïai khang beit ïa ki.
