Shillong, Naitung, 28:
Haduh 532 tylli ki longïing kiba hap hapoh ka jylli jong ka Dorbar Shnong Mawñianglah ki la mad ïa ka jingtyrkhong um mynta la shi bnai kynthih hadien ba ka Meghalaya Power Distribution Corporation Limited (MePDCL) ka la ot noh ïa ka bording na ki ar tylli ki Drilling Pump House namar ka jingbym siew jong ka tnat PHE, Investigation Branch ïa ka bai thang bording kaba la kot haduh T.1.60 lak.
U Acting Rangbah Shnong ka Dorbar Shnong Mawnianglah, Bah Mighty Giri Kharmih ha ka jingïakren bad u nongthoh khubor u la ong, “Ngi sngewsih ba ïa ka um ngi ïoh tang na Mawkhan bad ka rukom plie kam ju hok nalor ba tyllong um kaba rit bad ngi ïoh um ruh na Maweitnai, Upper Shillong Water Supply Schme. Hynrei, mynta la jan ar bnai naduh ba ki pipe um ki la dkut ha Mylliem ïa kiba tan um na Maweitnai shapoh shnong, ïa mynta ngi ïoh um tang na ka tyllong um kaba wan na Mawkhan bad nalor ba ka um ka mih ruh tang 10 minit,” la ïathuh u Bah Kharmih.
Nangta, u Bah Kharmih u la ïathuh ruh wat la ka shnong Mawñianglah baroh shikatta ka ju ïoh ïa ka um na ka tyllong Upper Shillong Water Supply Scheme (USWSS) kaba don ha Maweitnai, hynrei na ka jingdkut jong ki pipe ka um kam shym la poi shuh sha shnong.
“Ngi la leit pynsngew ïa kane ka jingdkut jong ki pipe um ha ka tnat PHE, hynrei haduh mynta kim pat dep shna,” la bynrap u Bah Kharmih.
Halor kane, ka Dorbar Shnong ka la pynsngew ruh sha u MLA jong ka Mylliem Constituency, Bah Ronnie V. Lyngdoh ba un buddien ha kaba ïadei bad ka tyllong um ha Mawkhan Pasir.
“Ngi la leit pynsngew ïa kane ka kam sha u MLA, Bah Ronnie ban ïarap pynsiew bad u la phah ban leit wad jingtip na ka PHE, Investigation Branch hynrei ka jubab kaba ngi ïoh ka long ba ka tnat PHE kam shym la ïoh pdiang ïa ka Bill, hynrei ynda ngi la leit mih sha ophis jong ka MePDCL ki la pyntip ba ki la dep phah ïa ka Bill sha ka tnat PHE,” la ong u Bah Kharmih.
“Ngi la kyrpad ïa ka tnat PHE ba kan siew noh ïa ka Bill kaba ym pat siew satia la shi bnai kynthih,” u la ong bad ïathuh ba na ka liang jong ka tnat PHE, Investigation Branch ki la pyntip ba kin siew beit ynda ki la ïoh pdiang ïa ka Bill na ka MePDCL.
