Shillong, Naitung 30:
U President ka National People Party (NPP) Meghalaya, Dr. W.R Kharlukhi uba dei ruh u MP ka Rajya Sabha ba mihkhmat ïa ka jylla u la pyntip ba ka seng kan sa pynbna ba lada ka donkam ban wad ïa u kyrtong ba un ïakhun ïa ka ilekshon MP Lok Sabha na Shillong Constituency ka ban long ha u snem 2024.
Haba ïakren bad u Dr. W.R Kharlukhi u la ïathuh ba haduh mynta ym pat don na ki nongkitkam ne ki nongtrei ka seng NPP ba kin pynpaw ba ki kwah ban pan tiket ïa ka ilekshon MP Lok Sabha na Shillong constituency.
U la ïathuh ba haduh mynta ka seng kam pat ïakren eiei ïa ka ilekshon MP Lok Sabha ka ban long la shem snem, hynrei kan sa ïakren ynda la jan dei ka por.
Nalor kata, u Dr. Kharlukhi u la pynthikna ba ka seng kan jop beit ha ka ilekshon MP namar ka jingdon ki nongthep vote ha ka seng NPP ka la bun bha lada shim ïa ka vote ha ka ilekshon MLA ba dang shu dep na Khasi Jaiñtia.
Halor ka ilekshon MDC ha KHADC bad JHADC, ka seng ruh kan sa wad kyrtong ha kito ki konstitwensi ki bym pat don kyrtong namar kan pynïeng baroh ki konstitwensi ha kine ar tylli ki district council.
Kum u MP ka Rajya Sabha u don jingkyrmen ba ka ilekshon MDC ha kine ar tylli ki district council kin long beit ha u snem 2024 namar ïa ka jingpynbeit thymmai ïa ka sixth schedule ka sorkar NDA hapoh ka jingïalam ka seng BJP kan nym pat wanrah mynta ha kane ka dorbar ha parliament.
Shuh shuh u Dr. Kharlukhi u la pynpaw ka jingsngewkmen ba ha kane ka jinglong President jong u ha NPP Meghalaya ka seng ka la ïoh ban synshar ïa ka jylla bad ïa ki lai tylli ki district council. Kane ka pyni ba ki paidbah ka jylla ki la ai jingkyrshan ïa ka NPP.
Kumta u don jingkyrmen ba ka NPP kan ïoh ban synshar biang ïa kine ar tylli ki council ha KHADC bad JHADC ha ka ilekshon MDC ban long ha u snem 2024.
Kum ban shu kdew haduh mynta tang ka seng NPP kaba dei ka seng kaba synshar ïa ka jylla kam pat pruid dak ïa u kyrtong u ban ïakhun ïa ka ilekshon MP ka ban long ha u snem 2024. Pynban kiwei ki seng kiba dang thymmai kum ka VPP hapoh ka jingïalam u Bah Ardent Basaïawmoit ka la dep pynpaw ba u kyrtong MP Lok Sabha un dei u Dr. Ricky Syngkon uba dei ruh u General Secretary ka VPP.
