Shillong, Naitung 31:
Namar ka jingdonkam ban ïoh jingmyntoi ki khyllung lyngba ka skhim Integrated Child Development Services (ICDS), ka jingpynrung Aadhar ïa ki khynnah ka la kiew sted ha Meghalaya bad mynta ka la poi sha ka 97 na ka 100 tang hapoh ar bnai.
Ïa kane la ïathuh da u Myntri ka tnat Social Welfare ka Jylla, u Bah Paul Lyngdoh haba kren sha ki lad pathai khubor ka Jylla lyngba ka video conference hadien ba u la dep ban ïakynduh ïa ka Myntri ka Sorkar Pdeng kaba peit ïa ka tnat Women and Child Development, ka Smriti Zubin Irani ha nongbah Delhi ha ka Lah Sngi U Blei.
U Bah Paul u la ïathuh ba ha kane ka jingïakynduh bad ka Irani, u la pynsngew katto-katne ki jingdonkam kiba ka Jylla ka dei ban ïoh na ka Sorkar Pdeng lyngba ka tnat Women and Child Development.
Haba batai ba ki jingïakren bad ka Irani ki long kiba seisoh, u Bah Paul u la ong ba u la ïakren halor ka jingdonkam ban pyllait noh ïa ka mang pisa kaba dang sahteng kiba ka tnat Social Welfare ka dei ban ïoh bhah ha kaba ka Irani ka la kular ban pyllait noh hapoh 2 bnai.
U la ong ba kane ka jingpyllait pisa kan ïarap ban ïoh siew noh ïa ka tulop ki nongtrei Poshan bad ka tulop jong ki ka dei saw bnai.
U Bah Paul u la ïathuh ruh ba u la pynsngew ba ki dang don ki shnong ha nongkyndong ki bym pat ïoh pynrung hapoh ka skhim ICDS sa kumba 1,500 tylli ki shnong bad kine kin sa rung noh ha kaba ka Sorkar Pdeng ka kloi ban pyllait pisa kumba ju long, kata 90 na ka 100, katba ka Sorkar Jylla kan hap bei 10 na ka 100.
U la ong ba ïa kane, na ka liang tnat Social Welfare kan sa pyndep noh ban pynbiang ïa ki jingdonkam hapoh 2 ne 3 bnai khnang ba ki shnong ki bym pat rung kin ïoh jingmyntoi noh, bad yn jied shwa ïa ki shnong kiba kham donkam eh.
U la ong ba ka ICDS ka dei ka program kaba donkam bha na ka bynta ki khyllung ba kin heh kin san bad ba kin ïoh ïa ki jingbam teimet lyngba kane ka skhim.
Shuh shuh u Bah Paul u la ïathuh ba yn dang bteng shuh shuh ban aibam ïa ki khyllung kiba hapoh 6 snem nalor ki kynthei kiba dang pun, bad khynnah kynthei ba sdang ka jinglong samla.
Halor ka jingpynïasoh Aadhar ki khyllung kiba ju ïoh myntoi na ka skhim ICDS, u Bah Paul u la ong ka jingpynrung ban ïoh Aadhar card ka la kiew sted bha.
“Haduh ka 12 tarik Jymmang mynta u snem, ki khyllung kiba ïasoh Aadhar ki long 13 percent ha kaba ka tnat Women and Child Development ka Sorkar Pdeng ruh ka la ong ban pynsangeh ïa ki jingmyntoi kum ka Supplementary Nutrition Program (SNP) namar kim don Aadhar. Hynrei tang ha kine ki khyndiat bnai, bad tang ha u Jylliew, ka la kiew na ka 13 percent sha ka 95 percent. Haduh mynta, ki khyllung kiba la don Aadhar ki long kumba 97 percent, bad ngi la ïoh ka jingkular na ka Sorkar Pdeng ban bteng ïa ka SNP ha Jylla,” la pyntip u Bah Paul.
