Jowai, Risaw 23
U National Vice Presi-dent ka NPP uba dei ruh u Symbud Myntri Rangbah ka Jylla Bah Sniawbhalang Dhar haba pan jingkyrshan na ka bynta u kyrtong ka NPP ha ka ilekshon MP shiteng samoi ka ban sa long shen, u la ong ba u Dr. D.R.L Nonglait u dei u briew uba la biang bha ban mihkhmat ïa ka Meghalaya ha Parlia-ment.
Ïa kane u Bah Sniawbhalang Dhar u la ong haba kren ha ka jingïalang paidbah kaba la long ha madan Wahriong Lympyrtuh, Mihmyntdu ha ka janmiet ka 22 tarik Risaw kaba la wan ïashim bynta da ki hajar ngut ki paid nongkyrshan ka NPP.
Haba batai ïa u Dr. Nonglait kum uba la biang bha ban mihkhmat ïa ka Meghalaya ha Parliament, u Bah Sniawbhalang u la ong, napdeng ki 534 ngut ki MP, lada ym bakla dei u Dr. Nonglait uba heh kyrdan tam ne qualification.
U la ong ba u Dr. Nonglait u bat ym duna 10 tylli ki degree, bad bynrap ba lada u jop kum u MP, tang na ka kyrdan ka jong u, u la ïoh lypa ka jingburom na ki briew.
“Nga ithuh bha ïa u Dr. Nonglait, watla um pat long u ‘politician’ hynrei u la leh ïa kiba bun ki kam bah na ka bynta ka Jylla. Ym tang ba u biang ha ka jingnang jingstad hynrei u dei ruh u briew uba sngewrit bad uba ïatreilang bad ki paidbah. U don ka mynsiem ïarap, bad kumba long mynta u ïarap haduh kumba 88-90 tylli ki kolej,” la ong u Bah Sniawbhalang.
Kane ka ilekshon MP shiteng samoi ka dei kaba kongsan bha bad donkam ruh ban ïoh ïa u MP uba don ha ka liang synshar na ka bynta ka jingmyntoi jong ki paidbah bad Jylla, la ong u Bah Sniawbhalang da kaba bynrap ba lada ïoh ïa u MP uba na ka liang pyrshah, ka jingduhnong kaba khraw kan long ïa ki paidbah.
U la kyntu jur ïa ki paidbah ba kim dei ban ngop ha ka jingpynbiej jong kiwei ki seng saiñpyrthei khamtam kawei party kaba um shym la pynpaw kyrteng, kaba u kynnoh ba ha ka por ilekshon ka kular ïa ki paidbah ba lada ka ïoh ban synshar kan thung kam ïa ki khun samla, pynban marsien wan ha ka bor synshar, ka beh ïa ki nongtrei kiba la trei da ki 8-9 snem ha District Council.
Ym tang katta, u la ong ba kane ka party, ka kular ruh ba lada ka wan ha ka bor synshar, tang hapoh shitaïew kan pynduh pyndam ïa ki khyrdop khrong khajna kiba pynïeng ha surok bah, hynrei kumba long mynta na kiba ju don 15-16 tylli poi pynban sha ka palat 30 tylli.
U Bah Sniawbhalang Dhar u la kyrpad ruh ïa ki paidbah ha ka jingïalang, ba kin ai ka jingkyrshan kaba pura ïa ka NPP bad ban pynjop ïa u Dr. D.R.L Nonglait, khnang ba u MP na Shillong Parliamentary Seat, un ïoh ka jingïatreilang bad ka Sorkar.
