Jowai, Risaw 23
Ka National People’s Party (NPP) jong ka 2-Jowai Constituency kala pynlong ïa ka jingïalang paidbah ha madan Wahriong Lympyrtuh, Mihmyntdu ha ka janmiet 22 tarik Risaw, na ka bynta u kyrtong ka NPP u Dr. D.R.L Nonglait ha kane ka ilekshon MP shiteng samoi na Shillong Parliamentary Seat.
Ha kane ka jingïalang la sakhi ïa ka jingwan ïashim bynta ki paidbah na ki shnong bapher-bapher jong ka 2-Jowai Constituency ryngkat ruh ka jingdonlang ki heh nongïalam ka party kynthup naduh u National Vice President ka NPP uba dei ruh u Symbud Myntri Rangbah ka Jylla Bah Sniawbhalang Dhar, u Myntri ka Sorkar Jylla bad MLA ka thaiñ Bah Wailadmiki Shylla, ki MLA kynthup u Bah Comingone Ymbon, Kong Santa Mary Shylla nalor ki MDC JHADC bad kiwei-kiwei.
U Dr. D.R.L Nonglait, haba pan jingkyrshan, u la kyrpad ïa ki paidbah ka 2-Jowai Constituency, ba kin kyrshan tyngeh bad ban pynjop don burom ïa u ha kane ka ilekshon shiteng samoi, namar kum u kyrtong ka NPP, u don jingthmu ban leh na bynta ka jingmyntoi ki paidbah ka Jylla, kata ban pynurlong ïa ka Ktien Khasi ha ka Khyrnit ba Phra jong ka Riti Synshar ka Ri India bad ban pyntreikam kum ka ktien Sorkar, bad ka ILP lem bad kiwei ki jingdonkam ki paidbah bad ka Jylla.
“Nga khot ïa phi wan lang da kawei ka jingmut na ka bynta kawei ka thong bad kata ka long ban jied ïa u MP uba don ha ka liang synshar bad ban pynlong ïa ka Jylla kaba don ïa ka sur kaba khlaiñ ha Delhi”, la ong u Dr. Nonglait.
U la kren ruh halor ka jingwan pynïasoh jong ki 3 ngut ki MLA ka UDP sha ka NPP, da kaba ong, “Katba kiwei ki nangpra, ki nangsakma, ka NPP ka nanglum ka nanglang”, da kaba u kdew ba ha ki khyndiat bnai bad taiew ba la dep, ka NPP ka don 33 ngut ki MLA, hynrei mynta da ka jingwan pynïasoh ki 3 ngut ki MLA, ka NPP kaba ïalam ïa ka Sorkar, ka don mynta haduh 36 ngut ki MLA.
