Shillong, Risaw 23
Ka kylla kaba ar jong ka jingïakren khappud hapdeng ka Meghalaya bad Assam ban pynbeit ïa ki jingïakajia ha ki 6 tylli ki jaka ba dang sah, yn sa pynlong noh shen, ong u Symbud Myntri Rangbah ba khmih ïa ka tnad Kam Pohïing Bah Prestone Tynsong.
“Shen kan sa urlong kane,” ong u Bah Prestone ha ka sngi Palei haba kylli lano ka jingïakren kan long biang.
U la ong ba ka jingïa hiar jurip lang ïa ki jaka khappud ka donkam ïa ka jingmynjur lang ïa ka por kaba biang.
“Haba ngi ong shen, phi dei ban sngewthuh kawei- ngi donkam ban don ïa ka jingsngewthuh bha ym tang na ka liang jong ngi hynrei na Assam ruh. Kumta, haba nga ong shen ka mut shisien ba ngi la mynjur ïa ka jingïajurip lang ba kan long lehse lashai lane la shisngi lane ha kano-kano ka por jong une u bnai lane bnai ban wan,” u la ong.
“Hynrei ïa mynta, lada nga ong nga la long ba la khreh lashai ka sngi, lada jia ka Assam kam pat long kaba khreh, phi sngewthuh, namar kine ki jait kam ki donkam ïa ka jingmynjur lang hapdeng ki ar Jylla, kumta ngi donkam ïa ki ar Jylla ba kin pynbeit ïa ka por kaba biang,” u la bynrap.
