Shillong, Risaw 23
U Samla Raymond Kharjana, President ka Khasi Students’ Union (KSU) u la ong “Ka jingshah set along ka long kum ka skul kaba ïarap ban pynphrang ïa ka jingmut jingpyrkhat bad ka jinglong rangbah jong uwei pa uwei u dkhot ka seng”.
U Samla Raymond u la pynpaw ïa ka jingsngewnguh ïa baroh kiba la ïadon bynta ban shaniah ha ka seng bad kyrshan khlem da kynran dien.
U la ong ba ha kine ki sngi, ki la don katto-katne ki jingkren bad jingïatai halor ki san tylli ki mat ba ka seng ka la buh, da kaba bynrap ba ki don katto-katne ki mat ki la sdang ban urlong, hynrei ki don pat kiba dang donkam ban buddien bad pynsngew biang sha ka Sorkar.
“Nga phah ka kyrwoh sha baroh ki paidbah bad khamtam eh sha ki dkhot ka KSU, ba ka along hi ka dei ka skulbah ban pynphrang ïa ka jingmut jong uwei pa uwei u dkhot. Ka jingshong ha along, kan ym lah ban pynduh bad pyntroiñ ïa ka mynsiem ïaleh jong ki nongïalam ba shah kem,” la ong u Samla Raymond.
Haba kylli, u Samla Raymond u la ong ba ka jingkem ïa ki nongïalam, kadei ka jingthmu ban pynduh mynsiem ïa kiba bun balang bad kumno ban pyntroiñ ïa ka seng hi baroh kawei.
“Ngin sa lum ïa ka jingïalang ki nongïalam baroh ban pyrkhat ïa ki kam bad ban pyntyllun nangne shakhmat,” u la ong, da kaba bynrap ba ka seng kan dang bteng ban buddien ïa ki mat jingdawa bad ban ïai pyrkhat ïa ki sienjam ban shim nangne shakhmat.
Ki ar ngut ki nongïalam ka KSU kiba la ïoh jamin noh ha ka miet jong ka 23 tarik u Risaw 2026, ki long u Samla Raymond Kharjana, President bad u Samla Reuben Najiar, General Secretary.
