Shillong, Risaw 23
Ka Meghalaya Pradesh Youth Congress (MPYC) ka la dawa ïa ka North Eastern Indira Gandhi Regional Institute of Health & Medical Scien-ces (NEIGRIHMS) ba ka dei ban bud ïa ka rukom thungkam nos kaba long 80:20 hapdeng ki kynthei bad ki shynrang, kumba la leh ha AIIMS, PGI bad JIPMER.
Haba kren sha ki nongthoh khubor ha ka Sngi Thohdieng, u Bah Eugene Jaraiñ President Laitumkhrah Block Congress u la ong ba dei ha u snem 2023 ka la wan ka jingkylla ha ka rukom thep kam nos ha NEIGRIHMS ha kaba u la kynnoh ruh ba ka don ka jingleh shiliang khmat ha kaba kiba bun kiba ïoh rungkam ki dei beit na ka Jylla Rajasthan.
U la ong ba ka NEIGRIHMS kam dei tang ka jaka sumar nongpang hynrei ka dei ruh ka jaka pule jong ki nos bad ki briew kiba wan shah sumar pang ruh kim dei tang napoh ka Jylla Meghalaya, hynrei ki wan na kylleng ki Jylla jong ka thaiñ Shatei Lam-Mihngi jong ka Ri India.
Shuh-shuh u la ong ba naduh ba la plie ïa ka NEIGRIHMS, ki nongtrei ruh ki la donkam bun, “Haba ngi peit ïa ki jaka pule lane ki jaka sumar kiba don ha kylleng ka Ri, ki bud beit ïa kata ka jingpynïaid ba ka jingthungkam ka long katkum ka ratio ba 80:20 kaba mut 80% ïa ki nos kynthei bad 20% ïa ki nos shynrang,” la ong u Bah Jaraiñ bad bynrap ruh ba la leh ïa kane na ka bynta ban ïada ïa ka jingshngaiñ jong ki nongshah sumar kynthei bad ki khyllung khynnah.
U la pynpaw ka jingsngew lyngngoh halor ba la buh ïa kane ka ratio ban pyntreikam ha ki jaka sumar lane jaka pule, hynrei ym shym la leh ïa kane ha NEIGRIHMS, u la ong, “Baroh shi katta kane ka jingbymbud ïa kane ka kyndon kam shym la paw than, hynrei ha kane ka jingthungkam nos ba dang shu dep ha u snem 2023, ngi la lap ba kine kiba thep kam thymmai 90% ki dei ki nos shynrang katba tang 10% ki dei ki nos kynthei”
U la ong ba kane ka jinglong jingman haba ïadei ka jingthungkam nos ha NEIGRIHMS ka pynkhuslai jingmut ïa ki paidbah bad kiba ju leit ban phah sumar ha katei ka jaka ai jingsumar. Nalor kata ruh u la kdew ruh ba kiba bun na kine kiba ïoh rung kam thymmai ki dei tang na kawei ka Jylla bad kynnoh ba kane ka paw ka jingleh shiliang khmat.
U la ïathuh ruh ba na ka liang ka MPYC ka la ïakynduh ruh ïa u MP ka Congress u Saleng A. Sangma ban pynpaw ïa kane ka jingkynrum kynram hapoh ka NEIGRIHMS bad kyntu ruh ïa u ban shimkhia ban ïakren ïa kine kiei-kiei ha ka jingïalang ka ban long ha ka 27 tarik u Risaw ban lah ruh ban pynthikna ban pynbeit ba kum kine ki jingïaidlait ïa ki kyndon kin ym jia shuh ha ki por ban wan.
