Shillong, Risaw 23
Ha ka sien kaba ar hapoh shi taïew, ka United Democratic Party (UDP) ka la mad biang ïa ka jingpait seng ha ka Sngi Thohdieng hadien ba u Lamphang ka Ïingdorbar Thawaiñ ka Jylla, u Thomas A. Sangma u la pdiang ïa ka jingpynïasoh jong ki 3 ngut (na ki saw ngut ki MLA ba dang sah jong ka UDP) sha ka National People’s Party (NPP).
Kane ka jinglong-jingman saiñ pyrthei ha ka Jylla ka la pynlong ïa ka UDP – ka seng heh kaba ar ha ka jingbun paid hadien ka ilekshon sha ka Ïingdorbar Thawaiñ ba dang shu dep, ban sah noh sa tang bad uwei u MLA.
Ka hukum jong ka Meghalaya Legislative Assembly Secretariat kaba la pynmih ha ka Sngi Thohdieng ka la ong ba ki lai ngut ki MLA – Bah Paul Lyngdoh (West Shillong), Bah Renikton Lyngdoh Tongkhar (Mawkyrwat) bad Bah Nujorki Sungoh (Mowkaïaw) ki la leit ban ïakynduh ïa u Lamphang ha ka 17 tarik u Risaw ban pynpaw ïa ka jingkwah jong ki ban pynïasoh noh sha ka NPP.
Ki la kam ba ki don ïa ka jingbun paid kaba donkam – kata ar na lai ha ka jingbun paid katkum ka ‘Paragraph’ 4 (2) jong ka Khyrnit ba 10 bad kdew ruh ïa ka ‘Resolution’ jong ka UDP kaba la rai ban pynïasoh bad ka NPP.
Hadien ba ki la pynshisha hi dalade ïa ki kot ki sla hakhmat u Lamphang ha ka 19 tarik u Lber, u Lamphang u la pdiang ïa ka jingpynïasoh jong ki.
Ka hukum ka pynkynmaw ba ha ka 16 tarik u Risaw, 8 ngut ki MLA ka UDP ki la ïasoh noh bad ka BJP, kaba la pynhiar ïa ka jingdon ki MLA jong ka ‘Legislature Party’ ka UDP sha ka 4 ngut. Ka jingpynïasoh sa ki 3 ngut sha ka NPP ha ka Sngi Thohdieng ka la pynhiar syndon ïa ka jingdon MLA jong ka seng sha uwei.
U Lamphang u la bthah ban ai jaka shong ïa ki 3 ngut ki dkhot ki ban long noh kum ki dkhot ka NPP.
“Ki 3 (lai) ngut ki dkhot ba la kdew haneng ki long ym duna ïa ka ar na lai bynta jong ki dkhot ka United Democratic Party Legislature Party hapoh ka Ïingdorbar Thawaiñ ka Meghalaya. U Lamphang namarba u la sngewhun ba ki la rai ban pynïasoh noh sha ka National People’s Party da ka mon sngewbha jong ki, u la pynmih ïa ka hukum ha ka 23 tarik Risaw, 2026 da kaba shim ïa ki jingshisha kiba la kdew haneng, pdiang ïa ka jingpynïasoh jong ki bad ka National People’s Party katkum ka ‘Paragraph 4’ jong ka Khyrnit ba 10 ka Riti Synshar ka Ri India, bad la bthah ban ai jaka shong sha ki dkhot ba la kdew haneng kum ki dkhot jong ka National People’s Party hapoh ka Ïingdorbar Thawaiñ ka Jylla,” ong ka hukum.
