Jowai, Naitung 31:
Ka jingshit rhem jong kumba duna 100 ngut ki dkhot jong ka Jaiñtia Students Movement (JSM) ban leit pynpra leit weng noh dalade ïa ka Entry Tax Gate ne ka khyrdop khrong khajna jong ka Karbi Anglong Autonomous Council (KAAC) ha Khanduli hapoh West Jaiñtia Hills Distrik ka la shu kut noh tang ha ka jingngop biang jong ki nongïalam rangbah ka JSM ha ki ktien ja-li ja-um jong ki majistor bad ki dkhot kiba la pyllait kyrpang na bynta kane ka sngi ki la hap ban shu leit phai ïing ïam-rem khlem da poi satia tang ha shnong Khanduli bad klet noh ban pynpra ïa katei ka khyrdop.
Ka JSM lyngba u President jong ka Western Region u Samla Ribok Biam ka la put turoi lyngba ki lad pathai khubor ba kin leit tur dalade naphang sha Khanduli ban leit pynpra noh ïa katei ka khyrdop jong ka KAAC kaba la shna hapoh u pud u sam jong ka Jylla Meghalaya bad ka la byrngem ruh ba jia katba jia kin tur beit shaphrang namar ki la ngiah hi shoiñ ïa ki jingkular bad jingpan por jong ki bor pynïaid distrik.
Phewse, ñiuma ha ka sngi Nyngkong mynta ka taïew, ki dkhot ka JSM kiba la don kumba duna 100 ngut bad kiba la mih da ka jingthmu ban leit hiar thma ha ki 25 tylli ki kali rit bad ki lama rong soh kiba la teh hakhmat jong ki kali, ki la pyndem noh da kaba suk khlem ka jingïaleh hakhmat ki pulit kiba saw ne san ngut kiba la ïeng ban pynsangeh ïa ki kali jong ki dkhot ka JSM bad ki pulit tang da iwei i siej kiba don tang kumba ar ne lai ngut ban khang lynti ha surok bah jong ka Shnong Namdong-B hapoh Namdong C&RD Block.
Ha katei ka jaka bala pynlong ïa ka jingap kdong ïa ki dkhot ka JSM la don tang kumba 10 ne 15 ngut ki pulit kiba la rah tang da ki suloi suda khlem ki lathi hapoh ka jingïalam jong ar ngut ki Executive Majistor kata u Bah W Kharbuli bad Bah S Phanbuh bad u DSP AJ Sangma.
Hadien ba ki la shah pynsangeh ha ki pulit, ki dkhot ka JSM ki la pynpaw ïa la ka jingdom ïa ki majistor ki bym shah ïa ki ban leit sha Khanduli. Nangta, ka la don ruh ka jingpynphai ktien bad ki majistor ba ki pynsangeh ïa ki ban leit sha Khanduli namar kim kwah ban don kano-kano ka huri-hura.
Hynrei kum ban shu pynkynmaw ka Village Defence Party (VDP) jong ki Karbi na ka shnong Myni ki la kyntur palat 50 meter na ka jaka ba la pynïeng ïa ka khyrdop khrong khajna sha ka shnong Khanduli ha ka sngi Saitjaiñ bad pynïeng ïa kawei ka signboard kaba la dep ban weng noh mardor ïa ka.
Ki majistor ki la ïathuh ïa ki nongïalam ka JSM ba ha ka 3 tarik u Nailar (August) u Myntri Rangbah jong ka Meghalaya un sa ïakynduh bad u Myntri Rangbah jong ka Assam bad lehse kin sa pynbeit noh ïa katei ka jingeh ba dang don ha Khanduli na ka daw jong katei ka khyrdop.
Kum ban shu pynkynmaw la pynïeng ïa ka khyrdop khrong khajna ha ka 15 tarik u u Ïaïong mynta u snem bad la pynpra ïa ka signboard jong katei ka khyrdop da ki paidbah ka Khanduli ha ka 17 tarik jong utei ujuh u bnai. Naduh katei ka sngi haduh mynta ka la mih ka jingïakynad hapdeng ki Pnar na Khanduli bad ki Karbi haduh ba ki Pnar kim ïoh lad satia ban leit rep leit riang sha ki lyngkha lajong kiba don ha ki shnong Karbi.
Ha kane ka sngi la don ruh na ki nongïalam ka JSM kiba pynkynmaw ba la dep pynpep arsien ïa ka jingïakynduh jong kitei ki ar Myntri Rangbah.
Kumta ki majistor ki la pynksan nia ïa ka jingpynpep na ka daw ka delimitation ne jingphiah konstitwensi ha ka sien ba nyngkong bad hana ka jingjia kulmar kaba shi miet ha Garo Hills kata ha ka 24 tarik mynta u bnai. Namar kata, ki nongïalam jong ka JSM da kaba sted ki la pdiang ïa ka jingpynksan nia ki majistor.
Namar kata, ki nongïalam jong ka JSM ki la rai noh ban pdiang ïa ka jingïasyllok na ki majistor ban nym leit shuh sha Khanduli. Kumta na ka liang ki nongïalam ka JSM kin ap ïa ka rai jong ka jingïakynduh jong u Myntri Rangbah ka Meghalaya bad u Myntri Rangbah ka Assam.
