Shillong, Naitung 31:
Ki nongshong shnong na Ummat-I bad Ummat-II kaba hap ha thaiñ Block-II kiba kynthup ïa ki trai jaka bad nongïalam shnong ki la wan buddien hi noh na ka bynta ban tip kumno ka Khasi Hills Autonomous District Council (KHADC) ka la leh haba ïadei bad ki kot jaka kiba ki la dep phah kumba hynñiew snem mynshwa sha ka Council bad ki la ïakynduh ïa u Deputy CEM u Bah Pynshngaiñlang N Syiem uba peit ïa ka tnat Elaka.
Na ka liang ki nongïalam shnong, ki trai jaka na Ummat-I bad Ummat-II ki la wan ïakren bad u Deputy CEM ha ryngkat ka Confederation of Ri-Bhoi People namar ka KHADC kam shym la shim khia ban pynbiang ïa ki kot ki sla wat haba ki paidbah na ki shnong ka thaiñ Block-II ki la dep ban aiti lyngba u MDC barim ka thaiñ u Bah James Sylliang la kumba hynriew ne hynñiew snem mynshwa.
Na ka liang u Bah Pateng Myrsing u la ong ba ka KHADC kam shym la leh eiei wat la ka dei ka nongpeit ïa ka khyndew ka shyiap bad ka Council kam shym la shim khia ban sngap ïa kaei kaba ki paidbah ki kwah kata ban leh ïa ka Land Record lyngba ka Council.
Ki la ïathuh ruh ba ki don kumba 300 haduh 400 tylli ki jaka ha kaba ïa ki kot ki sla la phah sha ka KHADC ban leh ïa ka Land Record, hynrei haduh mynta kane ka kam ka dang sahteng.
Na ka liang ki nongshong shnong bad ki nongïalam shnong ruh ki la pynpaw da kawei ka sur ba ki kwah beit ban don bad ka jylla Meghalaya bad ki la kyntu ruh ïa ka Sorkar ban sngap lem ïa kane ka jingkyrpad jong ki.
