Nongstoiñ, Risaw 21
Ka Khasi Students’ Union (KSU) ha ka 21 tarik u Risaw, kumba ju leh manla u snem, ka la pynlong ïa ka jingkynmaw burom ïa ka lyngkhuh sngi ïap jong u Wickliffe Syiem, uba dei u Syiem Khynnah ka Hima Nongstoiñ. Ka KSU West Khasi Hills District Unit ka la ïoh ban leit buh syntiew ha u mot dur jong u Païem Wickliffe uba don ha ka shnong Porsohsat, Nongstoiñ ha West Khasi Hills.
Ha kane ka sngi la wan ban don lang da ki dkhot ka KSU kiba hap hapoh ka jingpeit jingkhmih jong ka KSU West Khasi Hills District Unit, kumjuh da ki nongïalam ka CEC kiba kynthup ïa u samla Pynshaiborlang Rani, Assistant General Secretary, samla Spaindarsing Lyngkhoi Assistant Finance bad kiwei kiwei.
Ha katei ka jingleit buh syntiew, la pynlong ïa ka jingsngap jar kaba shi minit na ka bynta ki kam bakhraw jong u Païem Wickliffe Syiem bad kumjuh ruh ïa ki nongïalam ba hakhmat ka seng kiba don mynta ha along kata u samla Raymond Kharjana, President, samla Pynkmenlang Sanmiet Vice President bad samla Rueben Najiar General Secretary.
U samla Pynshaiborlang Rani u la ong ba kane ka sngi kam dei ka sngi tang ban rakhe sah kynmaw hynrei ka dei ka jingïai pyrto ïa ki kam ba khraw jong une u Syiem Khynnah ka Hima Nongstoiñ bad jong ka jaidbynriew hi baroh kawei.
U la ong ruh ba ka Sorkar India ha kato ka por ka lah ban kheiñ ïa u, kum uta u nongpyrshah Ri lane u riew ïaleh pyrshah ïa ka Ri hynrei ka jaidbynriew, ka KSU hi baroh kawei kan ñiew ïa u kum uta u riew khraw jong ka Ri, ha kaba ki riew khraw ki ïap hynrei ka nam bad ka kyrteng jong ki ka im na ka por sha ka por.
“Ngi ïakhun pyrshah ïa kiei-kiei ki ban pynmyntoi na ka bynta ka bha ka miat jong ka jaidbynriew hi baroh kawei, ngin shim ïa ka nuksa ïa kaei kaba u Syiem Wickliffe u ïakhun, ka long ba ngin nym ïa peiñ ïa kano-kano ka bym ïahap dur bad ka imlang ka sahlang bad ka jaidbynriew, ngin im ha Ri lajong ngin im laitluid, ngin shakri laitluid ngin trei laitluid kum u Khasi bad kum u khun u hynñiewtrep hynñiewskum,” u la ong.
Shuh shuh u la ong, “Kaei ba ngi don ban ong, ba kata ka jingim laitluid ka jong ngi kam dei kaba laitlan, ka jinglaitluid ka mut ka jingïaid ha ka lynti jong ka hok, kaba shisha bad ka tip briew tip blei ha kaba kum ka jaidbynriew ngi hap ban pynskhem ban tei ïa kine ki kynroh ki paia jong ka jaidbynriew ha baroh ki liang”.
U la ong ruh kumba u Syiem Wickliffe u dei u engineer ba nyngkong tam napdeng ki Khasi, u samla u la don ka kyrdan pule kaba biang bad tharai lada u la don ka kyrdan kaba biang ka kam ka jam ka jong u, u la shongsuk shongsaiñ ym donkam ban peit ïa ka synshar ka khadar ïa ka saiñ hima sima hapoh ka it ka Hima Nongstoiñ bad ïa ki Hima Khasi hi baroh kawei hynrei u dei u samla uba don ïa ka jingnang jingstad uba don ïa ka jingkitkhlieh na ka bynta ka bha ka miat bad ïa ka pateng jong ka jaidbynriew hi baroh kawei, u la ieh shadien ïa kita kiei-kiei baroh.
“Kaei kaba nga kwah ban ong paradoh parasnam ki jong ngi khamtam ïa kiba don ha ki kyrdan kiba halor kiba ngi, ngi ju ong ba tang lyngba ka jingsoi lane u khulom u jong ki, ka lah ban jia kaei-kaei ka ban sa jia hynrei nga sngew ban kyntu ïa ki rangbah, ki samla Khasi ki jong ngi kiba don ha ki kyrdan ba kham shalor da pyrkhat arsien lai sien ha shuwa ba phin shim ïa kano-kano ka rai kaba lah ban pynkjap ïa ka jaidbynriew ka jong ngi namar ba lada phi bakla ban shim ïa kano-kano ka rai lyngba uta u khulom u jong phi ka lah ban pyntroiñ ïa ngi ha kawei ka por,” ong u samla Pynshaiborlang. U la pynpaw ruh ïa ka jingsngew kmen, ka jingsngew sarong ba kum ki dkhot jong ka seng ki long shlur ki long khlaiñ wat hapdeng ka jingshah pyntyrha ha kiba bun ki liang.
U la ong ong ruh ba ka Sorkar India ha ka por u Tirot Sing, u Kiang Nangbah ki ïakhun pyrshah ïa ki shipai phareng ïa ki dohlieh, u Syiem Wickliffe u ïakhun pyrshah ïa ka Sorkar India, ka KSU bad ka jaidbynriew mynta ka ïakhun pyrshah ïa ki ingkhong shyllang mat.
“Nga kyntu ïa phi iwei pa iwei ba ngin long ki samla kiba don ïa ka nongrim kiba khlaiñ ka jingmut jingpyrkhat ba kiwei kin nym lah ban thied ïa ka nongrim ka jong ngi bad ma ngi ruh ngin nym lah ban pyndem ha kata ka jingshah pynbor ka jong ki la ka long ha kano-kano ka dur kano-kano ka rukom,” u la ong.
U la ong ruh ba kum ka seng kan ïeng skhem la ka nongrim khnang ba ki mat jingdawa kaba ka KSU ka dawa na ka por sha ka por kin ïai rhem kin ïai im bad ha kawei ka sngi yn sa lah ban ïoh ïa ka jingjop.
