Shillong, Risaw 21
Ki nongdie madan ba la kyrshan da ka Thma U Rangli Juki (TUR) ha ka sngi Balang ki la dawa ban weng noh mardor ïa ka shithi pynbna ka Shillong Municipal Board (SMB) ha ka 16 tarik u Risaw 2026, ba ka surok na GS Road sha Ïewmawlong kan dei ‘No Vending Zone’, da kaba ong ba ka long beaiñ.
Haba kren hadien ka jingïalang ba la pynlong, ka Kong Angela Rangad nongïalam ka TUR ka la ong ba kane ka shithi ba la pynbna ka la wanrah ka jingsngewkhia ïa ki nongdie madan ha GS Road, Motphran, Stand Jeep bad Ïewmawlong, kaba la bthah ba kin kynriah noh shuwa ka 25 tarik u Naiwieng bad ban leit shong sha Ïewmawlong Parking Lot.
“Ki nongdie madan ki la pynlong ka jngïalang ba kyrkieh namar ka shithi ba wan na u CEO, Municipal ka long shisha kaba sngewsih. Baroh ki nongdie madan na GS Road shaduh Motphran ki hap ban kynriah. Kane ka long ka jingpynbna beaiñ bad ka wan tang lyngba ki ki katto katne ngut kiba don ha ka bor Sorkar ha ka kyrteng jong ka PTVC,” la ong ka Kong Angela Rangad.
“Ngi dei ki nongmihkhmat ba hok ha ka PTVC. Ngi tip ïa ka jingïakren halor ka GS Road bad Motphran. Ngim shym la rai marwei. Ngi la lum lang namar ngi kwah ba ki nongdie madan hi kin peit la kata ka jaka ba ai ka Sorkar ka biang ne-em na ka bynta ka kamai kajih,” ka la ong.
“Kine ki jaka dei kiba biang bad kidei ki ïew pateng- Iewduh, Iewmawlong. Ka ïew kaba la rim bha. Ka aiñ ka ong ba phin nym lah ban beh ïa ki briew na ka ïew ba ki die pateng naduh mynshuwa, hynrei la kwah ban tan lang hajuh ïa kiba die madan ban leh kumba set ïa ki blang ki masi,” ka la ong.
“Mynshuwa ka SMB ka phah ïa ki trok, ban beh ïa ki nongdie madan surok bad ban rah ïa ki mar ki mata jong ki. Ngi la ïakhun ban ïoh ïa ka aiñ. Mynta haba ngi la ïoh ïa ka aiñ ki nongdie madan, phi pyndonkam bakla ïa ka aiñ bad phi hap pyndem,” ka la bynrap.
Haba jer kyrteng ïa ki lad ki lynti ba la tyrwa da ki nongdie madan, ka Kong Angela ka la ong, “Ngi la ai jingmut ïa ka Them Metor hadien ba ngi la ïakren bad ka Cantonment Board, ban shna ïa ki kudam, ki ïew die madan”.
“Dei ban ai ïa ka jingpynkynriah kaba biang. Ki nongdie jingdie ha GS Road sha Lum Survey, Ïewmawlong sha Syndicate, ki nongdie ha Parking Lot Tabung ban phah shong baroh sha ka mala ba nyngkong ha ka jaka ïeng kali, shano ki kali kin leit?” ka la kylli.
Haba ai por shi taïew, ka Kong Angela Rangad ka la ong, “Ngi la rai da kawei ka sur ban dawa ïa ka Sorkar ban weng noh mardor ïa ka jingpynbna. Ngim shah ïa kane, ka jingshah thombor. Lada ym lah ban weng noh hapoh shi taïew, kan don ka jingïakhih kaba jur namar ba phi thombor ïa ka mon jong ki paidbah bad phi ïaid lait ïa ka aiñ.”
