Shillong, Risaw 21
Ka Shillong Municipal Board (SMB) ka la khang pyrshah ïa baroh ki kam die jingdie madan ha shilynter ka GS Road, Motphran bad Ïewmawlong, da kaba pynbna ïa katei ka bynta kum ka “No Vending Zone” bad kane kan treikam noh mardor.
Ha ka jingpynbna ba la pynmih ha ka 16 tarik u Risaw, u Chairperson ka Town Vending Committee bad CEO ka Shillong Municipal Board u la bthah ïa ki nongdie madan kiba don ïa ki ‘Certificate of Vending’ (kiba biang) ba kin kynriah noh sha ka jaka die jingdie ba la shna thymmai ha lane shuwa ka 25 tarik u Naiwieng, 2026.
Ka SMB ka la ong ba kane ka sienjam ka long hadien jong ka jingpeit bniah ïa ki nongdie madan ha surok ba la pynlong hapoh ka Meghalaya Street Vendors (Protection of Livelihood and Regulation of Street Vending) Scheme, 2023, kaba la pyndep ha u Kyllalyngkot, 2024, bad hadien kata ka jingmynjur ïa ka thup kaba khatduh jong ki nongdie madan kiba dei hok hadien ki jingkam bad ki jingpyrshah.
Da kaba kdew ïa ka jingpynbna jong ka Sorkar Jylla ha ka 12 tarik Jymmang, 2026, ka SMB ka la ong, “Ka Sorkar Meghalaya, halor ka jingai jingmut jong ka Town Vending Committee, ka la pynbna ïa ka ‘Ground Floor Parking’, Ïewmawlong Parking Lot kum ka jaka die jingdie na ka bynta ka GS Road, Motphran bad ka thaiñ Ïewmawlong.”
Ka SMB ka la ong ba ki kam ban pynbiang ïa ki jaka die jingdie bad ki jingdonkam ba kongsan ha ka jaka ba la buh ki la dep lut.
Haba ïadei bad kane ka jingkhang, ka jingpynbna ka la ong, “Ka shi lynter surok baroh kawei jong ka thaiñ GS Road, Motphran & Ïewmawlong la pynbna kum ka ‘No Vending Zone’ da kaba pyntreikam mardor na ka bynta ka bit ka biang jong ka ïaid ka ïeng ki kali bad ka jingsuk jong ki paidbah kumjuh.”
Ha ryngkat ka jingmaham ban pynshitom ïa ki bym kohnguh katkum ka skhim 2023, ka SMB ka la ong ba ki mar ba la die ne pyni ha ki jaka ba la pynbna ba ym bit ban die ne ‘No-Vending’ hadien ba kut ka jingbuh por, “yn weng noh katkum ki kyndon jong ka aiñ.”
