Shillong, Risaw 21
Ïa ka tamasa bam Ñiangphlang kaba ju pynlong man la u snem, ha kane ka kynti la pynlong ha ka shnong Laitlyndop, Hima Sohra da ka jingthmu ban kyntiew bad ban khring ïa ki nongwan jngohkai pyrthei sha ki 15 tylli ki jaka jngohkai kiba don ha katei ka thaiñ.
Ïa kane ka tamasa bam Ñiangphlang kaba ar la pynlong da ka Synjuk ki Hima Arliang Wah Umiam Mawphlang Welfare Society ha ka jingïatreilang ka Meghalaya Tourism bad ka Khasi Hills Ecosystem Pvt. Ltd. ha kaba la snohktilang bad ka Dorbar Shnong Laitlyndop.
Ha ka 20 tarik u Risaw 2026, u MLA jong ka Sohra u Bah Gavin M. Mylliem u la wan ban plie paidbah ïa ka tamasa bam Ñiangphlang ha kaba u la pyllait paidbah ruh ïa ki 15 tylli ki jaka jngohkai kiba kynthup ïa ki kshaid, ki wah ba itynnad kiba katei ka dong ka thaiñ ka la ïaleh katba lah ban kyntiew haba ïadei ka kam jngohkai pyrthei.
Kine ki jaka jngohkai ba la pyllait ha katei ka sngi ki kynthup ka Kshaid Wei Kyndeh, ka Kshaid Prut, ka Jingkieng ïew, ka Wah Umsniang, ka Wah Umkrem, U Maw Ruti, ka Kshaid Janaliar, ka Wah Lyndop, ka Kshaid Lyngksiar, Mawsiang Ka Bthuh, Ka Mawsawa, Ka Shyngoid, ka Wah Nonglyer, ka Law-Lieng Law-Kyntang bad Jingkieng Syiem.
Haba ai jingkren kum u kongsan u Bah Gavin u la ong ba ka jingpynlong ïa ka tamasa bam Ñiangphlang ka long shi bynta ban pynneh pynsah ïa ka rukom bam tynrai, ka kolshor jong ka dong ka thaiñ bad khamtam lei ban pynpaw sha ka pyrthei.
U la ai ka jingïaroh ïa ka kynhun kaba la ïaleh ban kyntiew ban pynpaw nam ïa kane ka rukom im ha kajuh ka por ruh ban kyntiew ïa ka kam jngohkai pyrthei ha ka thaiñ, u la kyntu ïa ki paidbah nongshong shnong ban ai ka jingïatreilang haba ïadei ban sumar ban ïada ïa ka Mei Mariang na ka jingpluh ding ha ki khlaw khnang ba kine kiei-kiei kin neh kin sah ha ka pateng ban sa dang wan.
U la pynkynmaw ruh ïa ki sienjam kiba ka Sorkar Jylla ka la shim lyngba ka Green Meghalaya haba ïadei kumno ban pynneh pynsah khamtam ban pynrben bad pynjyrngam ïa ki khlaw ki btap ha kaba palat 3000 tam ngut ki briew kiba na ka dong ka thaiñ ki la ïoh jingmyntoi na kane ka skhim.
Nalor u Bah Gavin M. Mylliem, MLA, ha kane ka sngi la ïadon lang ruh u Bah Lambert Kharpamtiah, ophisar na ka tnad jngohkai napoh jong ka Sohra Civil Sub-Division, u Bah Mynjurlang Majaw, Acting Chief Hima Sohra, u Bah Tambor Lyngdoh, Founding Chairman ka Synjuk, ki nongkitkam ka REDD+ Project East Khasi Hills, ki nongïalam na ki shnong, na ka Hima, kiba ïatreilang ryngkat ka Synjuk, ki nongïalam shnong ka Laitlyndop bad kiwei-kiwei.
Ha kane ka sngi ka la don ka jingpyni nam ïa ki tiar tynrai, ki jingbam tynrai, jingshad bad ki jingïalehkai tynrai ryngkat ka jingpyni ïa ki riam tynrai ba nylla.
