Shillong, Risaw 21
Ka Laitumkhrah Dorbar Shnong Pyllun ka la pynrem jur ïa ka jingshah kawang petrol bomb ha kawei ka dukan jong ka Kong Sngurtimai B. Wahlang kaba la jia ha ka step phyrngap jong ka 21 tarik u Risaw 2026.
Ha ka kyrwoh khubor ba la phah da ki nongïalam shnong ka Laitumkhrah Dorbar Shnong Pyllun, ki la pyntip ba ha ka por mynstep jong ka 21 tarik u Risaw 2026, ha ki por 1:10 am ne 1:15 am, ki don ki riew sniew ki bym lah ithuh dur, ki la kawang petrol bomb ha 2 tylli ki dukan kaba dei trai ka Kong Sngurtimai B. Wahlang.
Ka Kong Sngurtimai B. Wahlang ka aiwai ïa kine ki dukan ha u wei ïa uba la tip kyrteng u Pramod Kumar bad u Parmanand Rai, kiba dei ki dukan marbam.
Ïa kane ka jingjia la pyntip nyngkong da ki pulit ba ïaid pahara ha kitei ki jaka.
U trai jong katei ka dukan bad ka Dorbar Shnong Laitumkhrah Pyllun, ki pynpaw ka jingsngewnguh ïa ki pulit kiba ïaid pahara kiba la shimkhia bad ïa ki nongtrei a Burger King, Laitumkhrah, Shillong, kiba la lah ban pynlip ïa ka ding.
Halor katei ka jingjia, ka Dorbar Shnong Laitumkhrah Pyllun ka pynrem jur ïa kum kane ka kam ban thombor ïa ki jaka shimet jong ki nongshong shnong, ka shnong Laitumkhrah.
Kum ki nongshong shnong kiba kohnguh ïa ka aiñ, ka Laitumkhrah Dorbar Shnong Pyllun, ka la kyntu jur ïa ki nongleh kam sniew, la kidei mano-mano ruh, ba kin kiar na kum kane ka kam, kaba pynjah burom.
