Shillong, Risaw 21
Ka Joint Action Committee (JAC) Against Shillong Ropeway Project ka la kyntait ban pdiang ïa ka jingkhot ïakren ka Sorkar Jylla haba ïadei ka projek ‘Ropeway’ da kaba la kynnoh ruh ba kane ka jingkhot ïakren ka khlem kynthup lang ïa baroh kiba sngewkhia ïa kane ka bynta.
Haba kren sha ki nongthoh khubor ha ka sngi Balang, u Chairman ka Green-Tech Founda-tion u Bah Bansiewdor Nonglang u la ong ba katkum ka shithi ba la soi da u Joint Secretary sha ka Sorkar Jylla Meghalaya, kaba kdew ba ki ban leit sha ka jingïakren haba ïadei ka projek Ropeway kin dei beit tang ki nongshong shnong ba sah ha syndah jong u Lum Shyllong.
U la ïathuh ba katkum katei ka shithi ba la pyntip sha ka JAC, katei ka jingkhot ïakren ka Sorkar Jylla kan long ha ka 22 tarik u Risaw ha State Convention Centre ha ka por 4 baje janmiet.
Shuh-shuh u la ïathuh ba na ka liang ka JAC ka la shim ïa ka rai ban ym ïashim bynta ha katei ka jingïalang da kaba kynnoh ba katei ka jingkhot ïakren ka long kaba khlem nongrim, namar ba tang ki katto katne kin shim ïa ka rai kaba ktah pat ïa ki paidbah ba bun balang.
Ka JAC ka la ban jur ïa ka Sorkar Jylla ban pynsangeh ïa katei ka projek ba la sdang ban pyntrei ha u Lum Shyllong bad ban pynkynriah sha kiwei ki jaka da kaba u la bynrap ba ka JAC kam pyrshah ïa ka jingwan jong ka roi ka par, hynrei ka pyrshah ïa ka jingjied ban tei ïa katei ka Ropeway projek ha u Lum Shyllong uba long u nongbsa umbam umdih ïa kiba bun tylli ki shnong ha ka nongbah Shillong.
Ha kaba ïadei kane ka jingkhot ïakren, Ka JAC ka la kyntu ïa ka Sorkar Jylla ba kan khot ïa baroh ki nongshong shnong kiba na kylleng ka nongbah Shillong kiba ïoh umbam umdih na ki tyllong um ba na u Lum Shyllong, kiba na Ri Bhoi ba bsa bording ïa ka Jylla, kiba ïoh jingmyntoi na ka Wah Umngot da kaba kdew ba ki tyllong ki dei na u Lum Shyllong.
Ka JAC ka la kyntu ïa ka Sorkar Jylla ban khot pynlong ïa ka Public Hearing ha madan Polo lane ha ki jaka ba ki paidbah ba bun balang kin lah ban ïashimbynta ban rai ïa kane ka mat bad da kaba kop ruh ban pynpoi da ki phew lak ngut ki briew kiba sngewkhia haba ïadei kane ka jingpynjot ïa ki dieng kiba don ha u Lum Shyllong na ka jingwan ka projek Ropeway.
U la kyntu ïa ka Sorkar da kaba ong ba “Wat shim ïa kano-kano ka rai ha kane ka jingïalang ka ban sa long bad lada mih kano-kano ka jingeh bad ka kynrum kynram kaba jur hapoh ka nongbah Shillong ka tnad kam jngohkai ka Jylla ka hap ban shim ïa ka jingkitkhlieh.”
