Nongpoh, Naitung 31:
Uwei u rangbah u la duh ei noh ïa la ka jingim hadien ba la suba jur ba u la shah tied bad shah mait da u sdie na ka bynta jong ka khlieh.
Kane ka la jia ha ka janmiet jong ka Sngi U Blei ha kawei ka ïing ha ka shnong Pyllun jong ka thaiñ Umroi ha Ri Bhoi Distrik, ha kaba une u briew ba la tip kyrteng kum u Rafiqul Islam la suba ba u la shah pynïap da kaba shah mait da u sdie na ka bynta ka khlieh.
Katkum ka tyllong khubor la ïathuh ba ki bor pulit ki la ïoh jingtip ha ka por 7:50 mynmiet halor katei ka jingjia ha kaba ïa utei u rangbah uba la mynsaw jur la pynkit noh sha Holy Cross Hospital, Umsaw na ka bynta ban pynïoh ka jingsumar, hynrei ki doktor katei ka jaka ai jingsumar ki la pynbna ba u la dep khlad lypa.
Ka khubor na ki pulit ka la ïathuh ruh ba utei u rangbah u dei uba sah ha katei ka ïing kaba don ha ka shnong Pyllun lem bad uwei pat u briew. La ïoh jingtip pat ha ka por ba utei u briew u la thiah lyngktar ha ryngkat ka jingdon lang ruh u kthaw ha syndah jong u.
Shuh shuh ki pulit ki la pyntip ruh ba na katei ka jaka sah, la lap ïa uwei u sdie uba la bit snam uba don marjan bad ka khlieh jong utei u rangbah ha kaba la suba jur ba u la shah tied haduh ba un da khlad syndon.
Halor kane ka bynta, ki pulit ki la ithuh ruh ïa u runar ba donkti halor katei ka kam, bad ka jingthwet ban ïoh kem ïa u ka la ïaid shakhmat. Ïa ka ejahar halor kane ka jingjia ruh la dep ban pynrung ha thanat Umïam.
