Shillong, Naitung 31:
Ka Khasi Students’ Union (KSU) ha ka Lah Sngi U Blei ka la ong ba ka Legal Rights Observatory (LRO) ka don ïa ki dkhot kiba treikam ym tang na shabar hynrei napoh ka Jylla kumjuh.
“Ka seng hadien ba ka ujor ejahar pyrshah ïa ka LRO, ka tnad pulit ka la phah khot ban sngap ïa ka jingpynsngew na ngi halor kane ka bynta,” la ong u Legal Affairs Secretary ka KSU, samla James H. Mawphniang hadien ka jingshah khot hajir ha thanat Lumdiengjri.
Utei u samla u la ong ba ka seng ka kyntu ïa ka tnad pulit ban leh eiei halor kane ka bynta – ka jingpynshit niam, isih jaidbyniew ba la pynsaphriang da ka LRO lyngba ki jingthoh jong ka ha ki rynsan lad pathai.
“Ka jingpynsngew jong ngi halor ka jingujor ejahar ka long ba ki mih ki jingkynthoh ïa ka seng kumjuh ïa ki nongïalam jong ki Balang bapher-bapher. Ngi la pynsngew ruh haba ïadei bad ka jingpynwandur ïa ka jingjia ha Mahadev Khola bad ka seng. Ngi la pynshai ba ka seng kam don bynta eiei ha katei ka jingjia bad ba ki pulit ki dei ban tohkit noh kham kloi ïa kane,” la ong u samla Mawphniang.
Haba kylli, u la ïathuh ba ka seng ka la buddien bad ka la ïoh jingtip ba ki don ki nongïalam na kiwei pat – ki lah ban dei ki kynhun niam ne jaidbynriew kiba don hapoh ka LRO.
“Ki pyntreikam ïa ka kynhun na shabar bad ki don ruh hangne ha Jylla. Kane ka kam ka dei jong ka tnad pulit, hynrei lada ka tnad kam leh eiei, ngi tip ba ki don ki briew kiba napoh ka Jylla hi…ki lah ban sah ha ki thaiñ jong ngi bad lada ngi lap…ngi maham da kaba tyngeh bad ka seng kan sa leh ïa kaba donkam,” u la ong.
Na ka liang u Vice-President ka seng, samla Biangbor L. Paliar u la kdew ba na ka liang u SP bad u Myntri Rangbah ka Jylla ki la pynshai ba ka jingjia ha Mahadev Khola kam dei kaba la ïadon bynta da kano-kano ka kynhun sengbhalang ne kynhun niam.
“Ka jingleh ka LRO ka wanrah ka jingmynsaw bad ka jingsngewpher jaidbynriew bad buh jingma ïa ki trai-ri trai-muluk…ki briew ba nabar ruh ki ïoh ban kren ban kynthoh ïa ngi,” u la ong.
Haba pynkynmaw ïa ka jingïakhih CAA bad Them Metor, u samla Paliar u la ong ba ki don ki jingthoh kiba ju mih ha ki rynsan lad pathai bapher-bapher kiba la pynsngew da ki samla ka jaidbynriew hynrei bunsien ki ju shah khot hajir sha ki thanat bad ophis u SP bad la ju pynshitom ïa ki.
“Ka seng ka sngew ba ka tnad pulit ka dei ban leh kumjuh haba ïadei bad ka LRO namar lada ïa ki jong ngi ki tan bad ïa kiwei kin pyllait, ka seng kan ym lah pdiang ïa kane,” u la ong.
Shuh shuh u la kyntu ïa ka Sorkar lyngba ka tnad pulit ban kem mardor ïa kito ki briew kiba donkti ban pynthohbria halor katei ka jingjia.
