Shillong, Naitung 31:
Ym tang ba ki la wan ban buhai shnong ha ki shnong bapher bapher kiba don ha khappud bad ka Assam, hynrei ki bar jylla ki la ïoh ban thied ruh ïa ki jaka puta bad ruh ban ‘register’ pynskhem syndon ïa ka khyndew ka shyiap kaba ki la thied kaba hap ruh hapoh u pud u sam jong ka Raid Marwet.
La kynnoh ba kine ki spah ngut ki bar jylla nalor ka jingwan buhai shnong hapoh u pud u sam ka Meghalaya bad khamtam lei na ka jingai jingithuh jong u Syiem ka Raid Marwet kaba hap hapoh ka Hima Mylliem, mynta ki la long trai syndon ym tang kum ki nongshong shnong, hynrei wat ban long trai ïa ka khyndew ka shyiap.
Ha kaba ïadei bad kane, na ka liang ka Hynñiewtrep Integrated Territorial Organization (HITO) Ri-Bhoi Distrik ka la kynnoh ba kane ka jingïoh lad jong ki bar jylla ba kynthup naduh ki Kuki, Meitei, Boro bad Assamese ki la ïoh ban bsuh khlieh bad long trai ïa ka khyndew ka shyiap, ka dei lyngba ka jingai jingithuh da u Syiem ka Raid Marwet da kaba u la ai syrnod No-Objection Certificate (NOC) ïa ki, kata da kaba kam ruh ba ki dei na ka jaidbynriew riewlum ne Schedule Tribe (ST).
Hato u Syiem ka Raid Marwet u don ka bor ban ai syrnod ne NOC sha ki bar jylla haduh ba kin lah ban thied ïa ka jaka puta? Lada ka long kumta, hato ka don ne em pat ka jingpynkheiñ ïa ki kyndon jong ka Land Transfer Act kaba dei ka aiñ ha kaba ki bar jylla kim lah ban thied jaka puta.
Hato kane ka jingleh jong u Syiem ka Raid Marwet, ka dei kaba la ai bor da ka Hima Mylliem ne ka dei kaba u la shu leh hi da lade shimet ne da ka jingtip jong ka Raid hi baroh kawei, ïa kaba kum ki khun ki hajar ki kwah ka jingshai, ba la ka dei kaba shisha ne kumno?
Na ka liang jong u General Secretary ka HITO Ri Bhoi Distrik Unit, u Bah Kenny Nongrum haba kren sha u nongpathai khubor, u la ïathuh ba tang mar ïa ïoh jingtip halor katei ka jingkynnoh leh sop-sop jong u Syiem ka Raid Marwet, ka seng ka la pynlong da ka jingwad jingtip lyngba ka hok ban jingtip ne ka Right to Information (RTI) bad la lap ïa ki jingshisha.
U la ong ba halor kane ka jinglap, na ka liang ka seng ha ka sngi Nyngkong ka taïew ka la leit ban ai syndon da ka jingujor sha u Deputy CEM ka KHADC, u Bah Pynshngaiñ N Syiem ba un tuklar mardor halor kane ka bynta bad ban leh ruh ïa kaba donkam.
U Bah Kenny u la ong ba na ka liang u Deputy CEM ruh u la kular ban shim khia halor kane ka kam bad ban pynbeit ïa ki jingdonkam baroh.
