Mumbai, Naitung 31:
Uwei u pulit ka Railway Protection Force (RPF) ha ka step jong ka Lah Sngi U Blei u la siat ïap ïa saw ngut ki briew ba kynthup ïa u Assistant Sub Inspector (ASI) hapoh kawei ka rel kaba dang ïaid hajan ka Palghar railway station ha Maharashtra.
Kham hadien la ïoh ban kem noh ïa utei u pulit ba la tip kyrteng kum u Chetan Singh. Na ka liang ka RPF ka la ong ba saw ngut ki briew ki la ïap, kynthup ïa u ASI, hapoh ka rel Jaipur-Mumbai Central Superfast Express (12956) na ka daw jong ka jingshah siat.
La ong ba u Chetan Singh u la siat na ka suloi jong u ha ka por kumba 5 baje mynstep. U la siat shwa ïa u ASI Tikaram Meena uba dei peit ïa ka kynhun pulit ba don lang une uba la siat ïap. Hadien kata, u la siat sa ïa lai ngut kiwei pat ki ’riew paidbah kiba don ha ka rel. Une u Chetan Singh u la siat kumba 12 kuli eiei. La ïathuh ba kane ka rel ka dang don ha lynti ban wan sha Mumbai na Jaipur.
Na ki lai ngut kiwei pat kiba la shah siat ïap, la ïoh shwa ïa ki kyrteng jong ki arngut ba kynthup ïa u Ajgar Abbas Shaikh, 48, bad u Abdul Kadarbhai Mohammed Hussain Bhanpurwala, 62. Ki pulit ki dang pyrshang ban ithuh sa ïa uwei pat.
U ASI Tikaram Meena u dei na Rajasthan katba u Chetan Singh u dei na Uttar Pradesh.
Na ka liang u Inspector General ka RPF (Western Railway), u Praveen Sinha, haba kren sha ki lad pathai khubor u la ong, “U (Chetan Singh) u dei u briew uba khluit khlieh. Ka khlem don satia kano-kano ka jingïania ne ka jingïakynad. U la shu khluit khlieh bad u la siat ïa u ophisar jong u bad sa ïa kiwei pat katba u la ïohi.”
La ong ba u Chetan Singh, hadien ba u la siat ïa kitei ki saw ngut hapoh ka rel kaba dang ïaid, u la pynsangeh ïa ka rel hadien ba ka la ïaid shakhmat ka Palghar Station, bad u la hiar hajan Dahisar Station, la ong u Chief Public Relations Officer ka tnat rel. Ki pulit da ka jingïarap ki pulit ka Government Railway Police bad RPF ki la kem ïa u Chetan Singh na Mira Road katba u dang thmu ban phet.
