Shillong, Naitung 31:
Ki kompeni na ka Ri Japan, United Kingdom (UK), United Arab Emirates (UAE), Singapore bad Germany ki la pynpaw ka jingkwah ban thung kam da ki nurse napoh ka jylla Meghalaya.
Ïa kane la pyntip da ka Myntri ka tnat ka Koit ka khiah ka jylla ka Kong Ampareen Lyngdoh haba kren sha ki lad pathai khubor ha ka sngi Nyngkong. Kane ka Myntri ka la pynpaw ba ki kompeni na kitei ki Ri ki thrang bad kwah ban thung kam da ki nurse napoh ka Meghalaya.
Ka Kong Ampareen ka la ong ba kumba ka long mynta, ki don bun kito kiba la dep ka jingpule nurse hynrei wat hadien ba ki la pyntbit ïalade haduh mynta ki shong khlem kam khlem jam hapoh ka jylla. Kumta kum ka Sorkar ka la wad ki lad ki lynti bad ha ka jingïakynduh ïa ki kompeni na kitei ki ri, la sngewthuh ba ka don ka lad ba ki nurse ka jylla kin don ka lad ban leit trei shabar ri.
Ka Myntri ka la ong ba halor kane ka bynta, ka sorkar kan pynlong ïa ka ‘Overseas Nursing Job Fair’ ha ka 4 tarik u Nailar ha State Convention Center ha Shillong, ka ban lamkhmat da ka tnat Labour bad ka wer ïa baroh kito ki nurse kiba shong ïing khlem kam khlem jam ba kin wan pynrung kyrteng ïalade na ka bynta kane ka lad. Ka la ïathuh ruh ba ka online register ba la sdang, haduh mynta ki la don palat 1000 ngut ki nurse kiba la dep ban pynrung kyrteng ïalade.
“Ka jingthmu ba hakhmat eh ba ka sorkar ka don ka long ba balei kito ki nurse kiba la tbit ha ki kam, kin shong khlem kam khlem jam, wat la na ka liang jong ka sorkar ka la plie kiba bun ki ‘nursing institutes’ ne ki jaka ai jinghikai ïa ki nurse ha kylleng ka jylla. Kumta kane kan dei ka lad ka kabu kaba ka sorkar mynta kan phai khmat,” la ong shuh ka Myntri.
Nalor kata, ka la ïathuh ba ïa kine ki nurse kiba la dep ban pynrung kyrteng na ka bynta kane ka Fair, yn sa phah ba kin leit pyntbit shuh shuh ïalade ha ki lai tylli ki jaka ba paw jong ka Ri kum ha Delhi, Mumbai bad Bangalore.
Ka la ong ba nalor kane, kaba donkam ka long ba kin hap ruh ban pyntbit ïalade ha ka ktien ka thylliej kaba ïadei bad kito ki jaka ba ki don khnang ba kan pynsuk pat ïa ka kam.
Ka Myntri ka la ong ba na ka bynta kane ka jingthmu, na ka liang jong ka Sorkar kan pynlut ruh T.50,000 na ka bynta iwei-pa-iwei, ki ban leit trei. Kumta na ka bynta kane, ka sorkar kan hap ban ïasoi ruh ïa ka soskular ne ka MOU bad baroh ki kompeni ki ban ïadon bynta bad kane khamtam lei na ka bynta ka jingshngaiñ jong ki nurse.
“Ynda la dep ban soi ïa ka MOU bad kine ki kompeni, ki nurse ki ban shah jied ban leit trei sha kitei ki ri, kin ïoh ïa ka jingsiew kaba long hapdeng ka T.1.5 lak sha ka T.2 lak ha ka shi bnai,” ka la ong.
Ka la ong ruh ba nalor kane, ka jingsoi MOU kan dei ruh na ka bynta ki nurse ba kin nym lah pat ban wan phai noh tang hadien 6 bnai ynda ki la leit trei. Lada kin leh kumta, kin hap ban siew ïa ka jinglut.
