New Delhi, Naitung 31 (UNI):
Ka Supreme Court ha ka Lah Sngi U Blei ka la ñion da kaba tyngeh ïa ka Sorkar Pdeng bad ka la kylli ïa ka ba balei ba ïa ka FIR halor ka jingshah pynïaid lyngkhuit ki arngut ki kynthei ha Manipur la shimpor haduh 14 sngi ban pynrung, kata, haba kheiñ naduh ka sngi ba kane ka la jia, kata, ha ka 4 tarik Jymmang bad haduh ka 18 tarik Jymmang kaba long ka sngi ba la pynrung ïa ka FIR.
Ki arngut ki kynthei kiba la shah pynlaw lyngkhuit ha u paidbhur ha Manipur ha ka 4 tarik Jymmang, shi sngi hadien ba ka jingïakynad ha kane ka jylla ka la sdang, ki la leit ujor mukotduma sha Supreme Court.
Mynta ka sngi haba shong bishar halor katei ka mukotduma bad kiwei pat ki mukotduma kiba ïadei bad ki kam ha Manipur, ki lai ngut ki nongbishar ka Supreme Court ba la khlieh da u Chief Justice of India (CJI), u Dr DY Chandrachud, ki la kylli ba balei ka la shimpor haduh 14 sngi ïa ki pulit ban pynrung ïa katei ka FIR.
Ka Supreme Court ka la ong ruh ba ïa kaei kaba la jia ha Manipur yn ym lah ban kdat sharud da kaba kdew sa ïa kiwei pat ki jingjia bad jingthombor kiba ha kiwei pat ki jylla.
Na ka liang u Solicitor General (SG), u Tushar Mehta, uba la mihkhmat ïa ka Sorkar Pdeng bad ïa ka jylla Manipur, u la ïathuh ba ka sorkar kam don eiei ban buhrieh. U la ong ruh ba ka Supreme Court ka lah ban peitngor hi ïa ka jingtohkit halor katei ka jingjia ïa ki arngut ki kynthei.
U nongïasaid aiñ ba pawkhmat, u Kapil Sibal, uba la mihkhmat ïa kitei arngut ki kynthei, u la pyrshah ïa ka jingtyrwa ban aiti ïa ka jingtohkit sha ka CBI bad ban pynkynriah ïa ka jingbishar ïa ka jingjia pyrshah ïa kitei ki arngut sha Assam.
Hynrei u Mehta u la pynshai ba ka Sorkar Pdeng ka khlem ong ba ïa ka jingbishar yn rah sha Assam, hynrei ka la shu ong ba dei ban rah noh shabar jong ka jylla Manipur.
Ka ïingbishar ka la kwah ruh ban tip na ka Sorkar Pdeng ba katno tylli ki FIR la dep ban pdiang bad pynrung pyrshah ïa ki briew kiba donkti ha kiba kum kitei ki jingjia bad jingthombor.
“Ka jingjia ha Manipur ka la pynkhih ïa ka jingïatiplem ka jong ngi. Kam dei kum ka jingjia bad ka Nirbhaya. Ka jingjia ha Manipur ka dei kaba shyrkhei. Ka jingïakynad ka dang ïaid haduh mynta. Ngi sngewkhia bha halor kane. Ka por ka la nang ïaid la lai bnai. Ki sabut ki lah ban jah noh. Mano ki ban long kita ki sakhi ha kaba ïadei bad kane ka jingjia,” la ong u Chief Justice.
Shuh shuh ka Supreme Court ka la kwah ban tip na ki nongïasaid aiñ ka Sorkar Pdeng la ki lah ne em ban ai ïa ki kyrteng jong ki nongbishar khnang ban ïoh thaw ïa ka kynhun tohkit kum ka SIT.
Ka ïingbishar ka la kren ruh halor ka jingdonkam ban ai jingïarap ïa kito ki nongshong shnong kiba la shah ktah na ka jingïakynad bad jingïaumsnam ha Manipur.
Nalorkata, ka la ong, “Ka sorkar Manipur ka leh aïu khnang ba kane ka jingïakynad kan ym jia shuh lym kumta kan sa jia biang hadien habud. Kaei kaba ka lah ban leh ka long kaba donkam tam,” la ong u Chief Justice.
U Chief Justice u la ong ruh ba ka ïingbishar kam sngewkhia tang halor kawei ka ‘video’ kaba la mih ha kaba ïadei bad ki arngut ki kynthei kiba la shah pynlaw lyngkhuit, hynrei ka sngewkhia halor baroh ki jingjia ha Manipur.
Ka jingbishar ïa katei ka mukotduma bad kiwei pat kan bteng ha ka Sngi Ba-Ar ha ka por 2 baje nohphai sngi.
