Shillong, Risaw 22
Ki dkhot bad nongïalam ka Joint Action Committee (JAC) Against Ropeway Project, ki la pynpaw ïa ka jingbym hun halor ka jingpynshai jong ka Sorkar ha ka jingïalang halor ka projek Ropeway, ha kaba ki la mih jyndat noh na katei ka jingïalang.
Haba kren sha ki lad pathai khubor ki nongïalam ki la pynpaw ba ki la shim ïa kane ka sienjam hadien ba kim shym la pdiang ïa ka jingpynshai u Secretary ka Raid Dorbar Pyllun, uba la pynpaw ba la dep phah jingtip sha ki Dorbar Shnong bapher-bapher halor ka Public Hearing ha u snem 2022.
Haba kylli, ki la ong “Ngim hun satia, namar katkum ka jingtip jong ngi, ym shym la don kano-kano ka jingïalang pynsngewthuh paidbah ha u snem 2022, kumba la kam”.
Shuh shuh ki la ong ba watla ka lah ban long, ba katto katne ki dkhot shnong kim shym la don ha shnong ha thaw ha katei ka por, hynrei ka jingkylli ka long balei ki shnong kiba marjan ruh kim shym la ïohsngew ïa kano kano ka jingpynbna halor ka Public Hearing?.
“Ka JAC, ka la dep ban thoh shithi sha ki nongïalam shnong, hynrei haduh mynta kim pat ïoh ïa kano-kano ka jubab,” ki la bynrap.
Haba pynpaw ïa ka jingsngew artatien halor ka jingong u Secretary ka Raid Dorbar Pyllun, ban klet noh ïa kaba la dep, ka JAC ka la buh jingkylli, kumno lah ban shu klet noh ïa kane ka mat?, Haba ka don ka jingkylli kaba khraw halor ka jingpyntreikam ïa ka projek bad ka jingpynlut pisa.
“Kumno lah ban shu klet noh ïa kaba la dep? Tang ki briew kiba don ha lyndet jong kane ki tip ïa kaba shisha, namar la dep phah ïa ka pisa,” ki la pynpaw.
Haba kylli la ka JAC ka pyrshah ïa ka jingpyntreikam ïa ka Ropeway Project, ki dkhot ki la ong ba kim dei ki briew kiba khlem jingtip, hynrei ki don ïa ka jingshemphang bad jingsngewthuh halor ka jingktah kaba lah ban mih na kane ka projek, khamtam ïa u Lum Shyllong.
Ki la pynpaw shai ba kim pdiang ïa ka projek ha katei ka jaka bad ki dawa na ka Sorkar ba dei ban pynkynriah noh ïa ka Ropeway Project sha kawei pat ka jaka, khnang ban lait na ka jingktah ïa u Lum Shyllong.
