Shillong, Risaw 22
U Bah Kitborlang Giri Jarain, President NPYF 17-North Shillong B.E.C, u la pynïasoh noh ïalade sha ka BJP, kaba la pdiang sngewbha ïa u da u Bah M. Kharkrang , nongaiktien ka BJP uba la pynpaw ba ka jingrung jong u Bah Kitborlang sha ka BJP, kan ai mynsiem ïa kiwei pat ki samla ban pynïasoh sha kane ka seng.
Hashuwa kane u Bah Kitborlang u la phah ka shithi iehnoh kam kum u President ka NPYF 17-North Shillong B.E.C sha u President bad Secretary ka 17-North Shillong, ha ka 16 tarik Risaw 2026.
Ha ka shithi iehnohkam, u Bah Kitborlang u la ong ba u iehnoh ïa ka kam kum u President halor ki daw shimet.
“Ngam kwah ba ka jingbym don jong nga, kan wanrah kano-kano ka jingthut ïa ka seng, ha ka ban pyntyllun ïa ki kam,” u la ong.
“Nga pynpaw ka jingsngewnguh kaba khraw ïa phi bad ïa ka seng kaba phi la buh ïa ka jingshaniah ha nga bad ai lad ïa nga ban shakri kum u President ka Youth Wing jong ka Konstitwensi jong ngi ha kine ki snem kiba la leit noh,” la ong u Bah Kitborlang.
U Bah Kitborlang u la ai khublei ïa ka jingkyrshan, ka jingïatreilang bad ka jingsngewthuh jingmut ha ka por ba u dang don ha ka kam kum u President. “Nga kyrmen ba ka party kan dang ïaid shakhmat ban trei ki kam ha ka Konstitwensi, ka imlang ka sahlang bad ha ka Jylla baroh kawei.”
“Nga kwah ba phin pdiang ïa kane ka jingtyrwa jong nga ban iehnoh kam bad nga kitbok ïa ka party ban dang bteng ban trei ki kam ha ki sngi ban wan,” u la bynrap.
