Shillong, Risaw 22
Ki nongdie madan kiba shong ha lynti ïaid kjat ha Jail Road, ki la kynnoh ba ka la don ka jingleh donbor jong ki bor ba dei khmih ka Shillong Municipal Board (SMB), kiba la beh tang ïa ki trai jylla kiba shong die jingdie ha katei ka jaka, katba ïa ki bar jylla pat kim ong ei-ei.
Katkum ka durkhih kaba la ringdur hi da ki nongdie madan, la lah ban ïohsngew ba ka la don ka jingïapyni nia hapdeng jong ki bad ki bor ba dei khmih ka SMB haba ïadei bad kane ka mat.
Haba kren sha ki lad pathai khubor, ka Kong Clarissa Sohtun, ka la ong ba ki bor pynïaid ka SMB kim shym la beh ïa ki bar jylla kiba shong die jingdie, katba ïa ki trai jylla pat tang mar ïa buh tiar ki la wan ban beh ïa ki, khlem shah ban shong.
Ka la ong ruh ba ki nongdie madan ki shu buh jah thait shiphang namar ba ki khia ban shu rah, hynrei ka SMB kam shym la shah satia ïa ki.
“Ngi la shong ha ki dukan jong ki bar jylla, namar ba ki la aibor ba ngin shong, namar ki bar jylla kim plie ïa ki dukan jong ki, hynrei ki nongtrei ka SMB ki shu wan beit ban phah lum ïa ki mar,” ka la ong.
Nalorkata, ka la ïathuh ruh ba ki la byrngem ïa ki, ba lada kim weng ïa ki dukan, kin pynduh noh ïa ka lisen jong ki.
