Nongstoiñ, Risaw 22
Watla ka don ïa ka jingitynnad ha ki sawdong sawkun jong ka mei mariang, khamtam ïa ka jingdon jong kawei ka kshaid kaba la paw bha ïa kaba la tip kum ka ‘Kshaid Weiñia’ kumjuh ruh ki jaka ïeng ban jngohkai bala shna kyrpang lyngba ka tnad Tourism hajan katei ka kshaid, kaba lah ban ong ruh ba ka la khring ïa kiba bun ki nongwan jngohkai pyrthei na kylleng ki jaka la ka long na ka Jylla bad nabar ruh kumjuh hynrei ka jingdon jong ki briew kiba shim kabu da kaba pynpra dusmon ïa kaba ym shym la tip la ki dei kiei kala pynlong bad wanrah ym tang ka jingduhnong hynrei ban pynduh noh ruh wat ïa ka jingitynnad ka jong ka.
Haba pyrshang ban wad jingtip na ki briew kiba shong dukan ha katei ka jaka halor katei ka jingjia, na ka liang jong ki, ki la pynpaw ba kim shym la ïohi bad ym shym la tip eiei halor katei ka jingjia.
Shuh shuh halor katei ka jingjia la ïoh jingtip pat ba ka Kurbah jong ka Ïawren bad Ïawlar ki la dep ban ïashong pyrkhat bad ka Kurbah ka la rah noh ïa katei ka phang ban ïakren sani bad ka shnong ruh ban ïathir jingmut lang kumno ban lap ne ban leh ïa kiba donkti ha katei ka kam leh dusmon.
Ka khubor, ka ong ba la suba ba katei ka jingjia kala jia naduh myn ha ka miet jong ka 16 tarik u Risaw, 2026 bad la lap pat ha ka step jong ka 17 tarik u Risaw, 2026 bad la suba ruh ïa ki katto katne ngut ki briew kiba donkti ha katei ka kam hynrei ka jingtohkit na ka shnong ryngkat ka Kurbah ka dang ïaid shakhmat.
Halor kane ka jingjia, ka khubor ka ong ba haduh mynta ym shym la don kano-kano ka jingleit ujor ejahar sha ki pulit ha kaba ïa kane la pynthikna ruh da u Superintendent of Police ka West Khasi Hills haba kren bad u nongthoh khubor.
