Shillong, Risaw 22
Ka United Democratic Party (UDP) ka la pynshai ba ka jingleit pynïasoh ki MLA jong ka sha kiwei pat ki seng saiñpyrthei ka dei hi ka rai shimet jong ki da kaba pynpaw ruh ba kum ka party kam don jingtip eiei bad ong ruh ba kan ym lah hi ruh ban bat ban khang ïa ka rai ka jong ki.
U President jong ka UDP u Bah Metbah Lyngdoh haba kren sha ki nongthoh khubor ha ka 22 tarik Risaw, u la ong ba ka party ka dang khlaiñ ka dang skhem bad ka dang don ruh shibun ki nongïalam da kaba kam ruh ba ki nongïalam jong ka Party ha ki District Level, ki Unit ba ha kylleng ka Ri Khasi ki dang skhem beit bad ka party.
U Bah Metbah u la pynshai ba kane ka jingleit pynïasoh jong ki 8 ngut ki MLA sha ka Bharatiya Janata Party (BJP) bad ka jingthmu leit sa ki 3 ngut ki MLA sha ka National People’s Party (NPP) ka dei beit ka rai shimet jong ki, hynrei kum ka party kam don bynta eiei haba ïadei kane ka bynta.
Shuh-shuh u Bah Metbah u la ong ruh ba kum ka party ka khlem shongthait ban trei na ka bynta ban pynkhlaiñ ïa ka party, “Ngi la nangïaid shaid-shaid ban wad ïa ki nongtrei kiba tbit na ka bynta ban ïalam ïa ka party, kumjuh ruh ban ïoh ïa ki kyrtong ki ban ïakhun ha ki ilekshon ki ban sa dang wan, kiba la leit ki la leit, ngin ym pdiang shuh ïa ki sha ka party, ki dang don shibun kiba kwah ban ïakhun ilekshon 2028 na ka UDP” u la ong.
“Na ka liang ka jong ngi ngin dang trei shitom ban dang pynkhlaiñ ïa ka party, ngi kyntu bad kyrpad ïa ki nongkitkam kumjuh ki nongkyrshan jong ka party ba phim dei ban don ka jingduh mynsiem hynrei to nang ïai don ryngkat ban ïatrei shitom lang ban pynkhlaiñ ïa ka party ha kylleng ka Constituency” la ong u Bah Metbah.
Haba ïadei ka ilekshon MP shiteng samoi ka ban sa long, u Bah Metbah u la ong ba ka UDP ka la don ïa u kyrtong jong ka u Bah Vivanstone G. Kharngapkynta uba khlem don kano-kano ka jingduh mynsiem na kine kiei-kiei kiba la jia long hapoh jong ka party, kumta u la kyntu bad kyrpad ïa ki paidbah ba ju ïeid bad kyrshan ba kin ai ka jingkyrshan ba pura ïa ka UDP ha kane ka kynti.
