Shillong, Naitung:
Ka jingsiang rong ka sorkar ïa ka surok shaduh Umsawli, Mawpat ka jingthmu ka long ban pynsuk ïa ki paidbah nongleit nongwan haba ki leit phah sumar ynda la plie ïa ka Tuberculosis Hospital, hynrei kane ka jingshna bha ïa ka surok ka shu long lehnohei.
Ka jinglap ba ka sorkar ka la shna bha ïa ka surok ka dei haba u nonglum khubor u la poi sha Umsawli ban leit peit ïa ka Tuberculosis Hospital kaba la shna mynta la saw snem ka bym pat plie haduh mynta.
Ka jingshna bha ka sorkar ïa ka surok ka la long naduh pyrshah ka ïingdorbar thawaiñ ka jylla kaba don ha Mawdiangdiang haduh National Institute of Fashion Technology Shillong kaba don ha Mawkasiang namar ka la shna haduh saw lynti (four lane). Na NIFTS pat ka la shna ïa ka surok shaduh Umsawli kaba ar lynti (two lane). Kat haduh mynta ki don ki jaka kiba dang shna ïa ki katto katne ki shlem treikam bad don kiba dang pyrshang, hynrei ïa ka surok pat la dep shna lut.
Wat la ka IIM Shillong Mawkasiang, Martin Luther University ki la long klas man ka sngi ha kitei ki jaka, hynrei ka sorkar kam pat pynheh ne pynbha namar ka dang rit haduh mynta.
Katba ïa ka surok ban leit sha TB Hospital la dep pynheh bad siang rong lut, wat la ïa kane ka jaka sumar ka sorkar kam pat plie haduh mynta. Kane ka la pynlong biang ïa kane ka jaka sumar ban sop phlang shabar bad kumjuh ki kamar klas ba la ieh shrah.
