Khliehriat, Naitung:
Ka Jaiñtia Eastern College, Khliehriat bad ka Meghalaya AIDS Control Society, Shillong ryngkat ka jingïatreilang bad ka Kyrmen Foundation lem bad ka Jaiñtia Hills Cement Manufacture Association (JHCMA) ki la pynlong ïa ka “Red Ribbon Club Youth Festival 2023” halor ka phang “Be inspired, Own your Future”.
Ha kane ka tamasa la wan ïashim bynta da ki samla pule bad khynnah skul na ki 7 tylli ki kolej bad 7 tylli ki skul na East Jaiñtia bad West Jaiñtia Hills District.
Ïa kane ka tamasa la pynlong ha ki 2 sngi lynter, kata ha ka 28 tarik bad 29 tarik mynta u bnai ha Jaiñtia Eastern College, Khliehriat ha kaba la wan ban plie da u Deputy Commissioner ka East Jaintia Hills, u Abhilash Baranwal, IAS, kum u kongsan.
Ha ka jingkren u DC u la ong ba kane ka dei kaba por ba ki samla ki rai na ka bynta ban ïoh ïa ka met kaba koit kaba khiah.
Ha kine ki ar sngi la pynlong ïa ki jingïakop bapher-bapher kynthup ka Abhivyakti (Red Show), RCC Quiz Competition, Marathon (Red Run) bad Flash Mob.
Ïa ka jingïalang la pynïaid da u Principal ka Jaiñtia Eastern College, Khliehriat u Dr. Phervision Nongtdu bad la ïoh ka jingbatai halor ka phang da ka Assistant Prof. P.S. Phawa bad haba kut ka jingïalang la ïoh ka jingkren ai khublei na ka Asistant Prof. F.D. Lytan.
Ha ka sngi sdang la pynlong ïa ka jingïalehkai ‘drama’ bad jingpynshai paidbah halor kumno ban ïada bad ban pynduna ïa ka jingsaphriang bad ka jingpur sted jong u khñiang jingpang HIV/AIDS lyngba ka ‘riewshemphang ka Kong Rinibeth Patlong, Program Manager, MCSWA TI CC Khliehriat ha Ladrymbai.
