Shillong, Naitung 31:
Namar ka jingmih ka khubor ha ki katto-katne ki lad pathai khubor ba ka la don ka jingdawa pisa da ka seng Hynñiewtrep National Liberation Council (HNLC) kumba T.20 lak na kawei ka longkmie kaba shong ba sah ha Mawlai lyngba uwei u briew ba la tip kyrteng kum u Synshar Khymdeit ha ka kyrteng jong ka HNLC bad ïa katei ka shithi la phah sha u Bah Bless Dkhar, President ka HNYF East Khasi Hills ban pan jingïarap na u halor katei ka jingshah dawa pisa jong katei ka briew.
Haba kren sha ki lad pathai khubor ban pynshai halor kane ha ka Lah Sngi U Blei, u Bah Bless Dkhar u la ong ba na ka liang jong ka seng HNLC ka la dep pynshai sha ki lad paidbah ba ka HNLC mynta ka dang don hapdeng ka jingïakren ïasuk bad ka sorkar jylla ryngkat bad ka sorkar pdeng bad ka khlem don bynta eiei ha kata ka jinglum pisa beaiñ, hynrei ka la dei tang ka jingshim kabu jong u Synshar Khymdeit.
“Tang ha kine ki khyndiat sngi ruh, na ka liang jong ka HNLC ka la dep pynshai sha ki lad pathai khubor bad sha ki paidbah baroh ba ka HNLC mynta ka dang don hapdeng ka jingïakren ïasuk bad ka la pynshai ba kam don bynta eiei bad kata ka jinglum pisa beaiñ, hynrei ka dei tang ka jingshim kabu jong u Bah Synshar Khymdeit”, la ong u Bah Dkhar.
U Bah Dkhar u la pynpaw ba ka seng HNYF ka la dap da ka jingkyndit kaba khraw haduh katta katta namar kum ki sengbhalang, wat lada na ka liang jong ka HNLC ka la thung ïa u Bah Sadon Blah uba dei u President rangbah ka seng ban long kum u ksiang jong ka HNLC, hynrei ha kaba ïadei bad kata ka jinglum pisa jong u Synshar Khymdeit, na ka liang ka seng kam tip eiei, hynrei ka la dap tang da ka jinglyngngoh.
Shuh shuh u Bah Dkhar u la ong ba baroh ki briew kiba shah dawa pisa ha ka kyrteng jong ka HNLC ki dei wan mih sha ka ophis jong ka seng HNYF ban pynshai ym ban shu pynmih ha ki kotkhubor. U Bah Dkhar u la ong ruh na ka liang ka seng HNYF ka la maham tyngeh ïa u Bah Synshar Khymdeit bad ïa kino-kino ki briew kiba pyndonkam bakla ïa ka kyrteng jong ka HNLC lyngba ka HNYF ban dawa pisa na ki paidbah.
“Ngi ngeit skhem ba ïoh ki don ki ’langïong ruh kiba sdang ban pynthut, kiba sdang ban woh kjat, kiba sdang ban bishni ïa ka HNLC, hynrei ïa kata ngim tip ba ki mih kum ha kine ki por bad kam long kaba shai. Hynrei na ka liang jong ngi, ngi kyntu ba ngin ïai buddien bad ngin ym shong kli-kti ban wad ïa kum kine ki briew kiba dawa pisa”, la ong u Bah Dkhar.
