Shillong, Naitung 31:
Namar ka jingkulmar jingmut haba ïadei bad ka jingpyntreikam ïa ka National Education Policy (NEP), 2020, ka Lady Keane College, Shillong ka la shim ïa ka rai ban pynsangeh noh shuwa shi por ïa ka jingshim klas na bynta ka ‘First Semester’.
“Kane ka long ka jingpyntip sha baroh ki samla pule jong ka ‘First Semester’ (BA, BSc & BCA) ba namar ka jinglong-jingman kaba pynkulmar jingmut haba ïadei bad ka jingpyntreikam ïa ka NEP-2020 hapoh ka Jylla, ka jingsdang ïa ki klas yn pynsangeh shuwa shi por na bynta katto katne sngi tat ynda pynbna da kumwei pat,” la ong u Principal ka Lady Keane College, Shillong, Dr. D.K.B. Mukhim ha ka kyrwoh.
Ha kawei ka liang, u Principal u la ong ba ki klas na bynta kiwei pat ki ‘Semester’ kin bteng kumjuh kumba ju long khlem kano-kano ka jingpynthut.
Kumban shu kdew hangne, ka Meghalaya College Teachers’ Association (MCTA), ka seng ki nonghikai kolej ha ka Jylla lyngba ka kyrwoh na u General Secretary, Dr. A.W. Rani ka la shim ïa ka rai ban ym ïatreilang bad ka skulbah North Eastern Hill University (NEHU) ha ka jingpynjari ïa ka National Education Policy-2020 ha ki kolej.
Ka dawbah jong katei ka rai ka long ba ka skulbah kam shym la bud ryntih ïa ka rukom treikam kumno ban pynjari ïa katei ka mat treikam.
Ka seng ka la ong ruh ba ha ka jingshisha, ïa ka jingpyntreikam ïa ka NEP, la dei ban wanrah shuwa ha ka ‘Academic Council’ (AC) kaba dei ka dorbar rai kam jong ka NEHU hynrei ym shym la don kano-kano ka rai halor katei ka bynta bad ha ka jingshisha ka AC ka la kdat sharud ïa ka mat la yn pyntreikam ne em ïa ka NEP ha ka Jylla naduh kane ka samoi pule 2023-24.
Ka seng ka la pynpaw ruh ka jinglyngngoh ba ha ka 12 tarik mynta u bnai, ka la wan ka hukum na u ‘Officer on Special Duty’, u D. Choudhry, College Development Council ba baroh ki kolej ha ka Jylla ki dei ban sdang pyntreikam noh ïa ka NEP naduh ka samoi pule 2023-24 bad ba la pynshong nongrim ïa katei ka hukum ha ka rai jong ka jingïalang ba 110 ka AC.
Ha ka jingsngewthuh jong ka MCTA, katei ka hukum ka long ka bym don nongrim, kaba lamler bad kaba ïalam bakla namarba ha ka jingïalang kaba 110 jong ka AC ym shym la don eiei kaba kum kata ka rai ban pyntreikam noh ïa ka NEP ha ki kolej jong ka Jylla.
Ka MCTA ka ïohi ïa katei ka hukum kum ka kam beaiñ jong ka skulbah bad ka jingshukor jong u VC bad na ka liang ka seng ka la phah dorkhast ruh sha u Vice-Chancellor ha ka 21 tarik Naitung, 2023 ba u dei ban weng mardor ïa katei ka hukum kaba lamler bad ban pynbeit ïa ki jingbakla baroh hynrei u VC u la sngap mynthi halor katei ka jingdawa ka seng.
Na ka liang ka seng ka hukum ruh ïa baroh ki dkhot jong ka ba kim dei ban shim ïa ki klas jong ka ‘First Semester’ ha baroh ki sobjek naduh ka 1 tarik Nailar, 2023. Ki dkhot kim dei ruh ban shim kano-kano ka kam haba ïadei bad ka jingpyntreikam ïa ka NEP tat haduh ban da pynbna da kumwei pat.
Ka seng ka la kdew shai ba ka jingtrei bad jingshim ïa kiwei pat ki klas katkum ka rukom long kaba rim kan ïaid beit kumba ju long bad kyntu ïa kiwei pat ki nonghikai ki bym dei ki dkhot jong seng ban kin ai ka jingkyrshan ha kane ka kynti.
