Nongpoh, Naitung 31:
Tang hadien katto katne ka jingpaw pyrthei ki jingduna kiba la jyrsieh ha ka skul Jawahar Navodaya Vidyalaya kaba don ha Niangbari, Ri Bhoi Distrik, u Deputy Commissioner ka Ri Bhoi u Arpit Upadhyaya u la shimkhia mardor ïa kane ka kam kaba la dep mih ha ki kot khubor bad ïathuh ruh ba u la dep ban phah ïa ki majistor ban pynlong ïa ka jingtohkit ban lap ïa ki jingshisha baroh.
U DC u la ïathuh ba ha katei ka jingleit tohkit, la ïadon ryngkat ruh ki ophisar na ka tnat Public Health Engineering lem bad ka Food Safety Inspector (FSI) bad pyntip ruh ha kaba ïadei bad ka jingbym biang jong ka um bad ka bam kaba khuid kaba suba, u la dep ïoh ïa ka kaiphod bad shen yn sa leh ïa kaba donkam.
U la ïathuh ruh ba ha ka sngi Nyngkong, na ka liang ki bor pynïaid distrik ki la pynlong ïa ka jingïalang lem bad u Executive Engineer ka PHE bad FSI bad wad ïa ki lad ki lynti kumno ban weng ïa kitei ki jingeh jong ki khynnah skul ka JNV kyrpang kiba ïadei halor ka khuid ka suba, ka umbam umdih bad ki jingbam jong ki khynnah skul. U la pyntip ruh ba lashai, kan sa don biang ka jingïalang bad ki bor ba halor jong ka tnat Food Safety ka jylla halor kane ka bynta.
Na ka liang u DC u la ong ruh ba ka long shisha kaba donkam eh ban pynbit pynbiang ïa ki jingdonkam jong ki khynnah skul ha ka rukom kaba dei khamtam ha kaba ïadei bad ka khuid ka suba. Na ka liang ki bor pynïaid distrik ki la leh ïa kaba donkam, wat lada dei ban shim ha ki kyrdan kiba kham shalor ruh kumjuh.
Ha kaba ïadei bad ka jingbym biang jong ki jaka leit shabar, ka hostel bad kiwei de ki jingduna ha katei ka skul, u DC u la ong ba wat lada um pat ïoh ïa ka kaiphod halor kane ka bynta, hynrei kumba la ïohi lyngba ki dur ki dar, u la kam, ba ka long shisha kaba sniew shaba palat bad ka bym lah satia ban pdiang. Kumta halor kane ka bynta ruh, u la kular ban shimkhia hapoh kine ki ar lane lai sngi ban leh ïa kaba donkam.
Halor ka jingkynnoh ba ka jingbym wan skul thikna jong u Principal ka skul JNV kumba la ujor da ki khynnah skul, u DC u la pyntip ruh ba halor kane ka bynta, yn pynlong ïa ka jingtohkit ban lap ïa ka jingshisha la ka dei ne em, bad lada ka dei kaba shisha ruh, yn leh da kaba tyngeh naba u la ong ba ka jingleit tista jong ki nonghikai ka long kaba donkam haduh katta katta na ka bynta ban kyntiew ïa ki khynnah skul. Ha kaba ïadei bad kane ruh, u DC u la ong ba tad haduh ba la ïoh ïa ka kaiphod jong ka jingtohkit, yn sa lah pat ban leh ïa kaba donkam.
Ha kane ka juh ka sngi, ki nongïalam ka FKJGP North Khasi Hills Distrik ba la lamkhmat da u samla Ricky Majaw ki la leit ban buh da ka jingthoh sha u DC ban kyntu ban shimkhia halor katei ka jingeh jong ki khynnah skul ka JNV kumba ki la lap ha ka jingleit jurip ka jongki kaba la pynlong ha ka 26 tarik mynta u bnai.
