Khliehriat, Nailar 01:
Ki pulit ka East Jaiñtia Hills District ki la ïoh ban kurup haduh 47.157 kilo u ‘Ganja’ na kawei ka kali Alto kaba don ïa u nombor AS23-J-0171 kaba dang thmu ban wan kiew sha nongbah Shillong na Tripura, bad ruh ban ïoh kem ïa ki ar ngut kiba la suba donkti ha kane ka kam.
Ka khubor na ki pulit ka la ong ba ha ka miet jong ka 31.07.2023, hadien ba la ïoh ïa ka jingtip kaba thikna halor ka jingdon jong ki arngut ki nongkhaiï drok kiba la wan da katei ka kali Alto na ka jylla Tripura da ka jingthmu ban wan rung sha ka nongbah Shillong, kumta na ka liang ki pulit ki la pynlong ka jingap shrip ha ka shnong Umtya bad ïoh ban bat noh ïa kane ka kali.
Hadien kane, ki pulit ki la kem noh ïa ki arngut ki suba donkti na kane ka kali. Haba pynlong ka jingtalasi ïa ka kali ha ka jingdon lang ki sakhi ba laitluid la lap haduh 37 tylli ki song ba la kyllaiñ da ka ‘brown tape’.
Hadien ba la leh ïa ka ‘test’ la shem ba u dei u ‘ganja’ uba don ka jingkhia kaba haduh 47.157 kilo.
Ïa kine ki arngut ki suba la tip kyrteng kum u Debbarma 37 snem bad u Pradip Debbarma, 32 snem rta kiba dei na ka thaiñ West Tripura District.
Nalor ka kali ba la kurup, na kine ki arngut la ïoh ruh ban kurup noh ïa artylli ki mobile phone bad ka pisa T.10,530.
Halor kane ka jingjia la pynrung case hapoh ki kyndon jong ka NDPS hapoh ka thanat Khliehriat bad ka jingtohkit ka dang ïaid shakhmat ban lapdien shuh sa kiwei kiba donkti ha kane ka kam beaiñ.
