Shillong, Nailar 01:
Ka Hynñiewtrep Youth Council (HYC) Sengkmie bad ka North Eastern Hill University Students’ Union (NEHUSU) ha ka Sngi Ba-ar ki la ai jingmut ïa u Vice-Chancellor ka North Eastern Hill University (NEHU), Prof. P.S. Shukla ban lum ïa ka jingïalang bad ki Principal jong ki kolej, ki nonghikai, ki ophisar Sorkar nalor kiwei-kiwei ban pynbeit noh shi syndon ïa ka mat haba ïadei bad ka jingpyntreikam ïa ka National Education Policy (NEP), 2020 hapoh ka Jylla.
“Ngi dawa ba u VC u dei ban khot ïa ka jingïalang ba kyrkieh jong ka Academic Council (AC) lane kano-kano ka jingïalang ha kaba baroh ki Principal bad kito kiba don ka jingsngewkhia, ki ophisar na ka Sorkar Jylla kumjuh ki sengbhalang ban ïadon bynta lang khnang ba kane ka mat kan ym ktah ïa lawei jong ki samla pule,” la ong u President ka HYC, Bah Robertjune Kharjahrin haba kren sha ki lad pathai khubor hadien ka jingïakynduh bad u VC.
U la ïathuh ruh ba u VC u la kular ban khot ïa ka jingïalang ka ban kynthup ïa baroh ki Principal jong ki kolej, ki nongmihkhmat na ki kynhun seng nonghikai – MeTTA, MCTA, ki ophisar ka Sorkar Jylla kumjuh ki sengbhlang ban ïakren halor katei ka mat khnang ba kan ym mih shuh kano-kano ka kynrum-kynram.
“Kumba ka long mynta, ki nonghikai, ki samla pule, ki kmie kpa, ki kulmar jingmut bad ngi dei ruh ban sngewthuh ba ka Jylla ka la nang hiar ha ka pule-puthi, te lyngba kane ka lah ban nang pynhiar shuh-shuh bad kumta ka seng kam kwah ban ïohi ïa kane,” u la ong.
Ka HYC-Sengkmie ha ryngkat ka jingdonlang ka NEHUSU ka la ïakynduh ïa u VC ka NEHU ban ïakren halor ka mat ba ïadei bad ka NEP-2020.
U Bah Kharjahrin u la ong ba ka seng ka la buh jingkylli la ka NEHU kan ai ne em ïa ka jingkyrshan sha ki kolej namar kumba ka long, ha man ba sdang pyntreikam ïa kano-kano ka mat treikam thymmai, donkam beit ïa ka jingkyrshan.
Haba kdew ba ki samla pule kiba la pynïasoh ha ki kolej bapher-bapher ki la pynïasoh lyngba ka rukom pule (Course) ka barim bad siew ruh ïa ka bai klas (katkum ka jingpule barim), u la buh jingkylli la kan don ne em ka jingkylla ha ka jingjied jong ki samla pule ha kane ka kynti bad kan don ne em ka jingban khia ïa ki kolej ban pynbiang ïa ki nonghikai, ki tiar ki tar bad ki jingdonkam baroh.
“Haba kut ngi tip ba kin hap siew ki samla pule bad kan don ka jingpynkiew ha ka bai klas ha ki jaka pule bad kane kan ktah shi kat dei ïa ki kmie ki kpa,” u la ong.
Haba kylli, u President u la ong ba kawei na ki jingduna ka Jylla ban pyntreikam ïa ka NEP ka dei ba kam long kaba la khreh ha ka liang ki jingdon-jingem, ban thung nonghikai ne wat ban pynbiang ha ka ban thied ïa ki tiar ki tar.
U la ong ruh ba lada ka Sorkar Jylla kam tuklar, kata ka NEHU kam lah ban ai jingkyrshan ha ka liang ka pisa, hynrei tang ka jingkyrshan ha ka pule-puthi.
Haba phai sha ka jingkyrshan pisa, ban thung ne siew tulop nonghikai, ban thied tiar, ban tei ïa ki jingdon-jingem, kata ka dei ka kamram ka Sorkar Jylla, u la ong.
“Ka jingeh baroh ka dei jong ka Sorkar, ngim long kiba la khreh namar ngim don kita ki briew kiba ïohi jngai…ki kolej kin hap siew tad ïa ki nonghikai namar kim lah ban shim ka bai klas kaba heh na ki samla pule na ka por sha ka por. Kin lah shaei ban pynbiang da lade ïalade lada ka Sorkar Jylla kam ïarap,” ong utei u nongïalam.
Ha kawei ka liang, u Finance Secretary ka NEHUSU, samla Mandor Diengdoh haba pynpaw ba watla ka jingïalang ka long kaba seisoh, hynrei haba phai pat sha ka bynta ba ïadei bad ka jingailad ïa ki kolej ban pyntreikam ne ym pyntreikam ïa ka NEP, u la ong, “Ka jingeh ka long ba kin sa mih 2 tylli ki ‘Course’ bad lashai ynda thep kam, kin shah ktah kito kiba bud ïa ka ‘Course’ ka barim (namar kin ym shim shuh ïa ki)…kin phai khmat sha kito kiba pyndep ïa ka jingpule bathymmai.”
Shuh shuh u la bynrap ba ka seng kam pyrshah NEP hynrei ka jingshim rai ka long kaba hak-dak khlem da pyrkhat bad kane kam ïahap satia.
