Nongpoh, Nailar 01:
Ka synjuk jong ki nongñiah kali ka Ri Bhoi District hapoh ka shatri jong ka Joint Action Committee of All Ri Bhoi Passenger Vehicles (JAC-ARBPV) ha ka sngi Ba-ar ki la leit ban tur kynsan sha shlem treikam u Deputy Commissioner (DC) ka Ri Bhoi ban pynpaw ïa ka jingbitar halor ka jingpynsahteng ka sorkar ban siew dep ïa ka bai kali kaba ki dei hok ban ïoh ha kaba ïadei bad ka jingleit kam ilekshon bad ruh ha ka por lynshop jong ka khlam Covid-19.
Kum ban shu pynkynmaw biang, na ka liang ka JAC-ARBPV, ka kynhun kaba kynthup ïa ka seng jong ki nongñiah sumo, bos, pick-up bad kiwei ki kali kamai jong ka thaiñ Ri Bhoi, ki la dep ruh ban mih paidbah ha ka 16 tarik u bnai Jymmang ban pynpaw ïa ka jingsngewbitar halor ka jingpynsahteng ban siew ïa katei ka pisa kaba ki dei ban ïoh.
Ha katei ka por, na ka liang ka JAC-APBPV ka la dep ruh ban ai da ka dorkhas sha u DC ka Ri Bhoi, u Arpit Upadhyaya, ban dawa ba u dei ban shimkhia mardor ban siew dep noh ïa ka pisa kaba ki dei hok ban ïoh.
Ha katei ka por, u DC u la pan por kumba 15 haduh 20 sngi ban pynurlong ïa katei ka jingdawa ka jong ki, hynrei phewse mynta la shi bnai tam ruh, katei ka jingkular ka shu kut tang ha ka jingkular bad khlem poi shaei shaei kaba la nang pynbitar shuh shuh ïa ki kum ki nongñiah kali kamai, da kaba kdew ba kane ka jingpynsahteng bad pynslem ban siew dep ïa ka pisa kaba ki dei hok ban ïoh, ka buh jingeh shikatdei ïa ka ïing ka sem ka jong ki nongñiah bad ki trai kali kamai ruh kumjuh.
Hadien kumba katto katne kynta jong katei ka jingtur ki nongñiah kali kamai, na ka liang u DC u la pan por biang sa kumba 15 sngi ban shimkhia ban pynurlong ïa katei ka jingdawa ka jong ka kynhun ki nongñiah kali bad na ka liang ki nongñiah kali ruh ki la pdiang ïa ka jingpan por u DC ha ryngkat ki kyndon ba ha kane ka kynti, kam dei shuh ban shu kut tang ha ki jingkular, hynrei ba dei ban pynurlong thikna kumba la kular.
Haba kren sha ki lad pathai khubor hadien ka jingïakren bad u DC Ri Bhoi, u Bah Vincent Sohkhwai, General Secretary jong ka JAC-ARBPV u la ong, wat lada ka JAC ka la pdiang ïa ka jingpan por jong u DC, hynrei kum ka kynhun jong ki nongñiah kali kamai ka Ri Bhoi u la byrthen ruh ba lada katei ka jingkular kam urlong, na ka liang ka JAC-ARBPV kan shim syndon da ki jingïakhih kiba tyngeh bad ki bor pynïaid district ki dei ban shim ïa ka jingbahkhlieh lada mih kaei kaei ka jingjia ba sngewsih.
Ha kajuh ka por, u la ong ruh ba lada kan ïai long ha kane ka rukom, ka kynhun jong ki nongñiah kali lehse ki hap ban sangeh noh ban ai ka jingtreilang bad ka sorkar khamtam nym treh ïadon bynta shuh ha kino kino ki jingdonkam jong ka sorkar nangne shakhmat ba kynthup ruh ïa ka ilekshon MDC ka ban sa long ha kine ki khyndiat snem kiban sa wan.
