Khliehriat, Nailar 01:
Ka surok ka long u budlum jong kano-kano ka shnong ka thaw. Ka surok kaba bha ka pynsuk ïa ka leit ka wan ki briew bad ka kyntiew ruh ïa ka ïoh ka kot jong ka shnong ka thaw. Hynrei ka long kaei-kaei kaba sangsot ban ïohi ïa jinglong jingman jong ka surok naduh na Lama shaduh Borkhat, East Jaiñtia Hills District kaba la shah ieh-shrah mynta la bun bun snem.
Kane ka surok ka dei kaba la tip kum ka Rymbai-Bataw-Borghat-Jalalpur Road. Kane ka surok lada dei ba ka long jlih ban ïaid ki kali naduh ki kali rit haduh ki kali heh ka pynïasoh ïa ka East Jaiñtia Hills bad West Jaiñtia Hills lyngba ka jingkieng Borkhat, kaba la dep ban shna myn ha u snem 2019.
Kane ka thaiñ ka long kaba kham kyndong bad sahdien ha ki bynta khappud ka India bad Bangladesh tang namar ba sniew tasam ka surok naduh ka shnong Lama shaduh Borkhat.
Namar ba la pynsyllang ïa ka leit ka wan jong ki paidbah lyngba kane ka surok, ha ka 31 tarik Naitung ki nongshong shnong jong artylli ki shnong (ka Borkhat bad ka Natbor) ki la ïamih paidbah ban pynlut la ka bor ka sor ban maramot hi ïa kane ka surok naduh na Lama shaduh ka shnong Borkhat kaba jngai 11 kilometer naba ka la ktah palat ïa ka ïaid ka ïeng jong ki paidbah ka thaiñ.
Haba ïakren bad u Waheh Shnong Borkhat u Bah Kyrmen Swer u la ong, kaba pynlong ïa ki ar shnong ban tynrong ha lade ïa ka jingkitkhlieh ban maramot ïa kane ka surok, ka dei hadien ba ki mad ïa ka jingsohsat ha ka ïaid ka ïeng, ka kit ka bah, ka pang ka shitom khamtam ki longkmie armet bad ha ka por lyiur ba jur u slap bunsien ki kali kim ju lait shuh ban ïaid namar ba ka la jur sa tang ka jyrsieh, ka thliew ka syar bad kaba la buh jingma ruh ïa ka jingim briew.
U Bah Daniel Pala, uwei na ki ’riew rangbah ka shnong Borkhat bad u Shanbor Suchen Secretary shnong Natbor ki la ïathuh ba mynshwa ha ka por ba ym pat phiah ïa ka Rymbai Constituency ki la ïoh ïa ka surok rong naduh Rymbai haduh Borkhat bad katno ka long ka jingkyrkhu ïa ki nongshong shnong kane ka thaiñ bad hadien ba la phiah ïa ka Constituency bad pynhap noh sha Saipung Constituency kane ka surok kala shah ieh shrah naduh kitei ki por haduh mynta.
Ki nongïalam shnong bad nongshong shnong ki ka kyrpad ïa ka sorkar bad ïa ka MLA ka thaiñ ka Kong Santa Mery Shylla ban phai khmat sha kane ka thaiñ ban pynjem ïa ka jingeh u paidbah khnang ka jingdon ka surok kan wanrah jingmyntoi ïa u nongshong shnong.
