Shillong, Nailar 01:
Ki nongkitkam bad ki nongkyrshan jong ka Bharatiya Janata Party (BJP) Mawsynram Mandal, East Khasi Hills District ki lah ban rung noh sha ka National People’s Party (NPP) ha kine ki khyndiat sngi na ka bynta ban pynkhlaiñ ïa kane ka seng ha ka ilekshon MDC bad MP Lok Sabha ka ban long la shem snem.
Katkum ka khubor kiba la ïoh lum la ïathuh ba ka seng NPP ka dang ïaid shakhmat ka jingïakren bad u Bah HM Shangpliang, MLA barim ka Mawsynram Constituency uba dei ruh u nongaibuit ba mynta jong ka tnad pule-puthi ka Sorkar Jylla ba un long kum u kyrtong ka NPP ha ka ilekshon MP Lok Sabha na Shillong Constituency.
Ki khubor ki ïathuh ynda ka jingïakren hapdeng u Bah HM Shangpliang bad ki nongkitkam ka NPP sengkmie ka la seisoh, kaba mut ba ki nongkitkam jong u Bah HM Shangpliang uba dang don mynta ha ka seng BJP kin sa mih noh na kane ka seng ban leit pynïasoh pura sha ka NPP.
Nangta, ki khubor ki ïathuh ruh lada ki nongkitkam jong u Bah HM Shangpliang ki rung sha ka NPP kin hap ban ïatreilang bad ki nongkitkam ka NPP ka Mawsynram Block ban kyrshan ïa u Bah Alvin Sawkmie uba dei u MDC ba mynta ha ka ilekshon MDC ka ban long la shem snem.
Kane ka jingïakren ban kyrshan ïa u Bah Alvin Sawkmie ha ka ilekshon MDC ka dei namar u Bah HM Shangpliang un long kum u kyrtong ka NPP ha ka ilekshon MP Lok Sabha ka ban long la shem snem.
Kum ban shu pynkynmaw, u Bah HM Shangpliang u dei u ophisar (IAS) ba la shongthait khlem pat dei por jong ka Sorkar Jylla. U la jop kum u MLA ka Mawsynram constituency ha u snem 2018 na ka seng Congress. U la shah rem noh haba ïakhun kum u kyrtong ka BJP ha ka ilekshon MLA ba dang shu dep na Mawsynram.
Ha kine bnai ka la mih ka khubor ba ki don lai ngut ki rangbah na ka seng BJP kiba pynpaw ba ki kwah ïakhun ïa ka ilekshon MP Lok Sabha. Kine ki long u Bah HM Shangpliang, Bah M Kharkrang bad Bah Ernest Mawrie.
Hadien ba u la shah rem ha ka ilekshon MLA, u Bah HM Shangpliang u la shah thung kum u nongaibuit ka tnad pule-puthi ka Sorkar Jylla kaba long Myntri da u MLA ka NPP u Rakkam Sangma. Dei hangne ba u Bah HM Shangpliang u sdang ka jingïadei kaba ïajan bad ki nongïalam ka NPP.
Haba u nongthoh khubor ha kine ki sngi u la ïoh ban ïakren lyngba ka phone bad u President ka NPP Meghalaya unit u Dr. W.R Kharlukhi u la pynpaw ba haduh mynta ym pat don ki nongkitkam na ka seng NPP kiba kwah ban ïakhun ïa ka ilekshon MP Lok Sabha hynrei ynda la dei ka por kin sa wad ïa u kyrtong.
U Dr. Kharlukhi u la pynpaw ruh ba ka seng ka don jingkyrmen ban jop ïa ka ilekshon MP Lok Sabha namar ki nongthep ‘vote’ ka NPP ki la bun bha lada kheiñ ha kane ka ilekshon MLA ba dang shu dep.
