Shillong, Nailar 01:
U Vice-Chancellor ka North Eastern Hill University (NEHU), Prof. P.S. Shukla u la ong ba ka jingpyntreikam ïa ka National Education Policy (NEP), 2020 ka long na bynta ka jingmyntoi ki samla pule.
U Prof. Shukla u la ong ba ka jingïalang ba 105 jong ka Executive Council ka la mynjur ban kynthup ïa ka NEP, 2020 ha ka jingïalang kaba la long ha u snem 2020 da kaba bynrap ba kane ka long katkum ki jingai jingmut jong ka jingïalang kaba 104 ka Academic Council (AC).
U Prof. Shukla u la ong ba ka jingïalang ba 104 jong ka AC ka la mynjur ruh ha ka ban pynïeng ïa ka ‘Task Force’ na bynta ka jingïaid beit ïaid ryntih haba ïadei bad ka jingpyntreikam ïa ka NEP.
U la pynshai ba kamram jong ka AC ka long ban mynjur tang ïa ki kyndon bad ka ‘Ordinance’ na bynta ka jingpyntreikam ïa ka mat treikam bathymmai halor ka pule-puthi.
“Ka AC kam don ha ka kyrdan ban shim rai ha ka ban pyntreikam ïa ka NEP. Ka rai ban pyntreikam ïa ka NEP ka shong bad ka Executive Council,” la ong u VC ka NEHU.
Na ka liang u Prof. Shukla, u la kren shai ba ka skulbah ka long kaba kloi ban pynbiang ïa baroh ka jingkyrshan haba ïadei bad ka jingai jinghikai na bynta ka jingpyntreikam ïa ka NEP.
“Kam don jingeh eiei namar ngi la slem lypa la 3 snem. Ngi la pyntreikam ïa ka NEP na bynta ki samla pule PG ha u snem ba la dep. Ngi la kdew lypa ba ka jingpyntreikam ïa ka NEP na bynta ka tnad pule UG kan sdang naduh ka samoi pule 2023-2024,” u la ong.
Ha kajuh ka por, u Prof. Shukla u la pynkynmaw ba la pynlong kumba 35 tylli ki jingïalang hapoh ka Jylla ban ïakren halor ka jingpyntreikam ïa ka NEP.
Ha kawei ka liang, u la ong ba kiba bun na ki Principal jong ki 73 tylli ki kolej kiba la ïashim bynta ha ka jingïalang kaba u la lum ki long kiba la khreh ban pyntreikam ïa ka NEP.
“Hooid ki don katto-katne ki kolej kiba la pynpaw ïa ka jingbym lah jong ki. Ai ba kito kiba la pynkhreh kin sdang pyntreikam ïa ka NEP bad kito ki bym pat pynkhreh, ki lah ban pynïasoh ha ka ‘Semester’ ka ban wan,” la ong u Prof. Shukla.
Haba jubab, u la ong ba un sa khot ïa ka jingïalang kumba la ai jingmut da ka NEHUSU bad HYC ha shuwa ka jingrakhe ïa ka sngi laitluid ka ri.
“Hynrei nga kloi ban ïakynduh ïa ka MCTA ban ïakren ha shuwa jong kane ka jingïalang, ban wad ka lad ka lynti lyngba ka jingïasngewthuh jingmut halor ki jingeh kiba don hakhmat jong ngi. Hynrei kam don jingkylli ba phai dien naba ïa kane la leh na bynta ka jingmyntoi jong ki samla pule,” la ong u VC.
Shuh shuh u Prof. Shukla u la bynrap ba um lah ban khot (officially) ïa ki dkhot ka MCTA naba kim hap hapoh ka jingkhmih jong ka NEHU.
