New Delhi, Nailar 01 (UNI):
Ka Supreme Court (SC) ha ka Sngi Ba-Ar ka la khot hajir ïa u heh duh ki pulit ka jylla Manipur lane u Director General of Police (DGP) ba u dei ban wan mih hakhmat ka ïingbishar ha ka Lah Sngi U Blei jong ka taïew ban wan khnang ba ka ïingbishar kan sngewthuh ïa ka daw jong ka jingslem ki jingtohkit halor ki kam bymman kiba la jia ha kane ka jylla.
Ka kynhun ki nongbishar ba la khlieh da u Chief Justice ka Ri India (CJI), u Dr DY Chandrachud, ka la hukum ïa u DGP ba u dei ban ai da ka jingthoh ïa baroh ki FIR kiba la pynrung ha ka jylla Manipur naduh ba la sdang ka jingïakynad ha ka 3 tarik Jymmang mynta u snem.
“Ngin sa shim ïa ka rai kumno ban ïaid shakhmat ha kato ka sngi (Lah Sngi U Blei),” la ong ka Supreme Court.
U Solicitor General ka Sorkar India, u Tushar Mehta bad kiwei ki nongïasaid aiñ ka Sorkar Pdeng ki la ïathuh ba ki don 11 tylli ki FIR kiba ïadei bad ka jingshah thombor ki kynthei naduh ba sdang ka jingïakynad ha Manipur. Ki la pynpaw ruh ba ïa baroh 11 tylli ki FIR lah ban aiti noh sha ka Central Bureau of Investigation (CBI) ba kan tohkit.
Kham hashwa, ka Sorkar Pdeng ka la hukum ïa ka CBI ba kan tohkit halor ka jingshah pynïaid lyngkhuit jong ki arngut ki kynthei ha Manipur kaba la jia ha ka 4 tarik Jymmang.
Ka Supreme Court, hadien ba ka la pule ïa ka kaiphod, ka la kynthoh da kaba ong, “Naduh u Jymmang haduh ba kut u Naitung, ka la don ka jingbym treikam shuh ki bor katkum ka Riti Synshar…ka jingïaid beit ïaid ryntih ka la dkut…”
“Kam don shuh kano-kano ka jingïaid beit ha Manipur; ki pulit ka jylla kim lah satia ban tohkit,” ka la ong hadien ba ka la sngewthuh ba ki la don tang khyndiat ngut kiba la shah kem watla ki la don palat 6,000 tylli ki First Information Report (FIR) lane ki jingujor.
Nalorkata ka ïingbishar ka la ong ba ki pulit ka Manipur kim lah shuh satia ban tohkit ïa ki jingjia ha kylleng ka jylla kynthup ïa ki kam thombor pyrshah ïa ki kynthei.
“Ka jingtohkit ka long kaba suki haduh katta katta. Ym don satia kiba shah kem…Kane ka pyni ba kam don shuh ka jingïaid beit ïaid ryntih ha kane ka jylla katkum ki kyndon ka Riti Synshar. Ka lah ban dei ba ka jingkem ïa ki briew ka khlem urlong na ka daw ba ki pulit ki khlem ïoh ban rung sha ki shnong ki thaw, hynrei watla katta ruh, ka don ka jingbym ïaid beit shuh jong ka rukom treikam,” la ong u CJI.
Ka jingbishar kan long biang ha ka 7 tarik Nailar halor ki mukotduma kiba ïadei bad ki jingjia ha Manipur.
