Shillong, Nailar 01:
Ka Voice of the People Party (VPP) ka la kyntu ïa ka Sorkar Jylla ba kan shim ïa ki lad ki lynti ba mardor ha ka ban pyllait noh ïa ka pisa ba ïadei bad ka jingpyntreikam ïa ka skhim Mahatma Gandhi National Rural Employment Guarantee Act (MGNREGA) ha Meghalaya.
Ha ka kyrwoh khubor ba la pyllait da u nongaitkien ka VPP u Dr. Batskhem Myrboh u la pynkynmaw ba ka Sorkar Pdeng ha ka 26 tarik Jylliew 2023 ka la pynmih ïa ka hukum na ka bynta ban jingpyllait noh ïa ka pisa jong ka wat ba nyngkong (1st installment) kaba ïadei bad ka jingthied ki tiar ki tar jong u snem 2023-2024 sha ka Meghalaya kaba kot sha ka T.301.94 klur.
U nongaiktien ka VPP u la ong, “Ka jingpyllait kloi ïa ka pisa ka long kaba kongsan bha na ka bynta ki paid nongkyndong kiba shaniah ha kane ka skhim ba kin ïoh kamai jakpoh.”
