Shillong, Nailar 01:
Ki nonghikai napoh West Khasi Hills District kiba la leit ban pule ïa ka D.LED na ka Study Centre kaba don hapoh Sib Sing Government Higher Secondary School, West Khasi Hills District ha ka Sngi Ba-ar ki la leit ban ïakynduh ïa u Myntri ka tnad pule-puthi ka sorkar jylla, u Rakkam A Sangma hadien ba ki bor pynïaid ki khlem lah satia ban pynmih ïa ka resol jong ki 29 ngut ki nonghikai la 7 snem.
Haba kren sha ki lad pathai khubor hadien ka jingwan ïakynduh ïa u Myntri, u Bah Shembor Langrin u la ïathuh ba ki bor pynïaid ki la leh thurmur ha kaba ki khlem lah satia ban pynmih ïa ka resol la 7 snem bad la pynpaw pynban ba kitei 29 ngut ki nonghikai ki khlem wan leh satia ïa ka eksamin ka jong ki.
“Kaba sngewsih ka long ba hadien ka resol kaba pynmih, ka pyni ba baroh ki nongïakhun ki pep”, la ong u Bah Langrin.
U Bah Langrin u la ong ba na ka liang ki nonghikai wat la ki la ap da ki snem ban ïoh ïa ka hok jong ki halor ka jingpaw ha ka resol ba ki 29 ngut ki nonghikai kiba la ïaleh ïa ka D.LED ki khlem wan leh ïa ka eksamin bad ki lah pep hynrei la ïohi pynban ba ka khlem shym la don satia kano-kano ka jingshimkhia naduh ka ophis jong u State Nodal Officer ha DERT haduh ka Regional Office kaba don ha Guwahati.
“Ha ka jingïaid lynti jong ngi haduh kumba 7 snem naduh 2015-2016, ngi la ap shitom hynrei haduh mynta mynne na ka liang jong ka NIOS bad na ka liang jong ka Study Centre bad kumjuh ruh jong ka DERT bad khamtam na ka ophis SDSEO kaba la phah leit pyntbit ïa ngi kum ki nonghikai kiba la don ha ka kam, na ka liang jong ki, ki khlem shim ïa kano-kano ka jingkitkhlieh hynrei wat haduh mynta ka resol jong ngi ka dang paw ba ngi pep”, la ong u Bah Langrin.
U Bah Langrin u la ïathuh ba hadien ka jingbuddien ka jong ki halor kane ka kam, la lap ba ka jingleh thurmur ka dei namar ka jingdkoh treikam jong ka DERT kaba la pyni ba ki pep ïa ka eksamin jong ki.
“Ngi hap ban kynnoh ba kine kiei kiei baroh ki dei ki jingdkoh treikam jong u State Nodal Officer naduh nangne na DERT kaba peit ïa kane ka NIOS hapoh Meghalaya kaba la pynlong ïa ngi ki nonghikai ba ngin long ki lanot ha kane”, la ong u Langrin.
Na ka liang jong utei u Myntri ka tnad pule puthi u la kular ba un sa shimkhia halor kane ka jingïakynduh jingeh jong kitei ki nonghikai bad shen yn sa pynmih noh ïa ka resol jong kitei ki nonghikai bad ban buddien ïa katei ka kam kaba na ka liang jong ka NIOS ka la pynsahteng baroh shikatta.
